Passage

'o na 'di mthong lam rnam par mi rtog pa'i ye shes bzhi pa dang mtshungs sam zhe na/ lam la grub tshul gyi cha nas mi mthun pa'i dbang gis go rim so sor byung la/ de lta na'ang dbang gsum pa'i ye shes mthong lam du grub chen mai tri pas kyang 'dod cing/ khyad par Dom+b+hi herukas:

e ma do mthar rmad kyi chos
phyag rgya'i rkyen gyis rtogs pa yin
mngon sum lam du grags pa ste
byin rlabs lam du gyur ba yin/

zhes dang/

kha cig dpe zhes zer ba ni
yang dag don la rgyab phyogs pa'i
byis pa rnams kyi smra ba yin
des ni lhan cig skyes pa yi
ye shes ming tsam thos par zad/

ces sogs dgag sgrub rgya cher 'byung mod/ de lta na'ang snye ma lnga ba las/ de ci 'di mthong ba'i lam [237] yin nam zhe na/ de lta ma yin te zhes pa la sogs kyis de ltar 'dod pa bkag pas phyogs gnyis su 'dzin pa'i rtog ge'i rigs pa 'ba' zhig gis sngags lam 'grel zhing skye 'gag du 'dzin pa rnam grangs pa'i don dam gyis ye shes kyi rang bzhin bzhal ba rnams kyi dgag sgrub ni byis pa 'drid pa'i tshig bla dwags sram du go la/ spyir gang zag gi sbyangs pa dang dbang po'i rim pa la ltos nas dbang thob sogs ni mang du snang bas grub chen e gnyis lta bu'i ngos nas dbang 'og ma gnyis kyi 'bras bu'i go 'phang gang yin pa mngon du gyur ba'i tshe dbang gsum pa mnyan pas de'i lhan skyes nyams myong gi zag pa dang bral ba gcig car du mthong na bzhi pa'i ye shes dpe la ma ltos pa thod brgal du skyes pa'i mtha' yang 'gog par mi nus te/ 'di ltar rgyud las dga' bzhi'i rim pa dang dbang bzhi sbyar ba'i phyir dang/ khyad par rdo rje theg pa'i lam ni byang chub kyi sems mi shigs pa bde bar gshegs pa'i snying po can yin la mi shigs pa nyid kyis mi 'gyur ba'i bde ba mngon du byas pa 'bras bu yin na lam des de 'thob pa 'og tu bstan pa'i phyir ro/ yang dbang po shin tu rtul pos thabs lam zab mo'i cho ga la brten nas bde ba dang bcas pa'i mi rtog pa yud tsam nyams su myong ba'i tshe rtog pa rags pa mang po zhig 'gags pa yod kyang 'dod chags bde chen du 'ching ma nus na rang bzhin snyoms 'jug gi gnas skabs ltar snang ba tsam ste de ni gshis kyi gnas tshul gtan ma rtogs pa'i gang zag la'ang skye mod kyis/ des mthong lam gyi bden pa mthong ma yin no/

de bas na dbus mtha' las sems med [238] ba'i gnas skabs lngar chos sku nyams su myong bar bshad pa'i don ni snang yul mi 'dzin pa'i cha la btags pa tsam yin pa ltar/ 'dir snyoms 'jug gi rkyen las so so rang rig gis rig cha dang 'gal ba'i rtog med tsam skyes pa gang zhig mas brtan gyi dga' ba la brten nas 'dod chags bde chen du 'ching mi nus pa rnams la ni dper yang rung ba dka' ste 'pho med kyi bde ba la yun du goms nas de'i rang bzhin shes dos pa'i phyir ro/ 'di ltar sngags ni mngon sum gyi lam yin pas rjes dpag dang 'gal ba'i phyir gang zag rim gyis pa rnams la snga phyi rgyu 'bras kyi tshul du gnas pas gsum pa'i lam du dpe'i ye shes zhes bya ba chos thams cad bsam du med pa de kho na nyid kyi gzugs brnyan bde bas thabs byas pa'i lhan cig skyes dga'i shes rab la goms par byas pa las bzhi ba'i dus na/ rang bzhin ci yin pa mthong ba'i thabs byung 'bras bu'i lhan skyes mngon sum du skye ba yin te/ ...