Passage

skyes bu gsum gyi lam gyi rnam bzhag mdor bsdus tsam zhig brjod par bya ste/ de yang rang kho na'i don du tshe phyi ma'i 'khor ba'i mngon mtho tsam gtso bor don du gnyer ba'i cha nas bzhag pa'i bsam pa de skyes bu chung du khyad par can gyi lam gyi mtshan nyid/ mtshan gzhi ni/ skyes bu chung ngu'i rgyud kyi 'chi ba mi rtag pa rtogs pa'i blo dang/ mi dge bcu spong gi tshul khrims lta bu'o/ de dag la [423] brten nas rang rgyud ldan gyi gang zag mngon mtho'i go 'phang du bgrod par byed pas na skyes bu chung ngu'i lam zhes brjod do/

'khor ba'i phun tshogs la blo log pa'i sgo nas rang kho na'i don du thar pa gtso bor don du gnyer ba'i cha nas bzhag pa'i bsam pa de skyes bu 'bring gi lam gyi mtshan nyid/ mtshan gzhi ni/ skyes bu 'bring gi rgyud kyi mi rtag sogs bcu drug rtogs pa'i blo lta bu'o/ de la brten nas rang rgyud ldan gyi gang zag thar pa'i go 'phang du bgrod par byed pas na skyes bu 'bring gi lam zhes brjod do/

snying rje chen po'i gzhan dbang du gyur pa'i sgo nas sems can gzhan gyis sangs rgyas thob phyir du rnams mkhyen don du gnyer ba'i cha nas bzhag pa'i bsam pa de skyes bu chen po'i lam gyi mtshan nyid/ mtshan gzhi ni/ skyes bu chen po'i rgyud kyi snying rje chen po dang/ lhag bsam rnam dag lta bu'o/ de la brten nas rang rgyud ldan gyi gang zag bla na med pa'i byang chub tu bgrod pas na skyes bu chen po'i lam zhes brjod do/