1. gangs can mkhas grub rim byon ming mdzod

ཁོང་ནི་རབ་བྱུང་མ་ཚུགས་གོང་གི་ཤིང་མོ་ཡོས་ལོ་སྟེ་སྤྱི་ལོ 1015 ལོར་མདོ་སྨད་ཙོང་ཁར་སྐུ་འཁྲུངས། རབ་བྱུང་དང་པོའི་ས་ཕོ་རྟ་ལོ་སྟེ་སྤྱི་ལོ 1079 ལོར་རྭ་སྒྲེང་དུ་སྐུ་གཤེགས། ཁོང་གིས་སྤྱིར་དགེ་བའི་བཤེས་གཉེན་མང་པོ་ལ་བསྟེན་ནས་མདོ་སྔགས་རིག་གནས་དང་བཅས་པར་སྦྱངས་པ་དཔྱིས་ཕྱིན་པ་མཛད། སྒོས་སུ་ཇོ་བོ་རྗེ་དཔལ་ལྡན་ཨ་ཏི་ཤའི་ཞབས་ལ་གཏུགས་ཤིང་ཇོ་བོའི་ལུགས་ཀྱི་[1904]གདམས་ངག་ཐམས་ཅད་རྫོགས་པར་ཞུས། དེ་ཡང་ཇོ་བོ་རྗེའི་ཆིབས་པ་སྐྱོང་བ་དང་ནང་ལས་རྣམས་ཀྱང་ལེགས་པར་མཛད་ཅིང་ཞབས་ཏོག་བཟང་པོ་བསྒྲུབས། དེ་ནས་སློབ་དཔོན་ཉན་ཚོར་མཇལ་ཞིང་ཇོ་བོའི་ཆོས་རྣམས་ཞིབ་ཏུ་གསན་སྐབས་སྒོམ་པ་ཉམས་ལེན་གཙོ་བོར་མཛད་པས་རྣལ་འབྱོར་པ་ཆེན་པོ་ཞེས་གསོལ། ལྷག་པར་དུ་ཇོ་བོའི་བཞེད་པའི་བདེན་པ་གཉིས་ཀྱི་ཆོས་ལ་འབྲོམ་སྟོན་པ་རྒྱལ་བའི་འབྱུང་གནས་ལས་ཀྱང་ཁོང་མཁས་པར་གྲགས། དགུང་ལོ་ལྔ་བཅུ་ཐམ་པ་རབ་བྱུང་དང་པོའི་ཤིང་མོ་སྦྲུལ་ལོ་སྟེ་སྤྱི་ལོ 1065 ལོར་རྭ་སྒྲེང་དགོན་པའི་གདན་སར་ཕེབས་ཤིང་ལོ་ངོ་བཅུ་བཞིའི་རིང་དུ་དགེ་འདུན་མང་པོའི་ཚོགས་པ་བསྐྱངས། འབྲོམ་སྟོན་གྱིས་མཛད་པའི་རྭ་སྒྲེང་གི་ཁྱམས་སྨད་ལ་སོགས་པའི་བཞེངས་འཕྲོ་རྣམས་བསྒྲུབ་པའི་ཕྱིར་འབད་འབུངས་མཛད་པ་ལ། དང་པོར་དཀའ་ངལ་ཅུང་བྱུང་ཡང་དུས་ཕྱིས་སུ་སྐུ་བསོད་ཤིན་ཏུ་རྒྱས་ཏེ་ལེགས་པར་གྲུབ། དེ་ནས་བསྟན་འགྲོའི་དོན་ཆེན་ལེགས་པར་གྲུབ་ཅིང་དགུང་ལོ་དྲུག་ཅུ་རྩ་གསུམ་པར་དགོངས་པ་ཆོས་དབྱིངས་སུ་གཤེགས། ཁོང་གི་སློབ་མ་གྲགས་ཆེ་བ་ནི་སྟོད་ལུང་པ་རིན་ཆེན་སྙིང་པོ་དང་། ལྷབ་མི་ཆེན་པོ། དགེ་བཤེས་མང་ར་ལ་སོགས་པ་ཡིན། ཁོང་ནི་རྭ་སྒྲེང་དགོན་པའི་གདན་རབས་གཉིས་པ་ཡིན་ནོ། །

Further Details