1. gangs can mkhas grub rim byon ming mdzod

ཁོང་ནི་རབ་བྱུང་བཅུ་བཞི་པའི་མེ་ཕོ་བྱི་ལོ་སྟེ་སྤྱི་ལོ 1816 ལོར་མདོ་སྨད་དབལ་ཤུལ་དུ་ཡབ་མཁའ་འགྲོ་འབུམ་དང་། ཡུམ་ཁ་ནག་བཟའ་བསོད་མོ་རྒྱལ་གཉིས་ཀྱི་སྲས་སུ་སྐུ་འཁྲུངས། འདས་ལོ་མི་གསལ། ཁོང་དགུང་ལོ་ལྔ་པར་ཀུན་མཁྱེན་བླ་མ་དང་གུང་ཐང་འཇམ་དབྱངས་གཉིས་ཀྱིས་སྐུ་གོང་མའི་སྤྲུལ་སྐུར་ཐུགས་ཐག་བཅད་ཅིང་གདན་སར་བཀོད། དགུང་ལོ་བདུན་པར་ཀུན་མཁྱེན་མཆོག་ལས་རབ་བྱུང་དགེ་ཚུལ་དཀྱུས་གཅིག་ཏུ་བསྒྲུབས། དགུང་ལོ་དགུ་པར་རྒྱན་འཇུག་སོགས་ལ་ཐུགས་འཛིན་གནང་ཞིང་དགུང་ལོ་བཅུ་གསུམ་པར་ཆོས་གྲྭར་ཞུགས། ཁྲི་ཆེན་སྟག་ལུང་བློ་བཟང་ཉི་མ་ཡོངས་འཇིན་[1836]དུ་བསྟེན་ནས་གཞུང་བཀའ་པོད་ལྔ་ལ་སྦྱངས་པ་དཔྱིས་ཕྱིན་པ་མཛད། དགུང་ལོ་ཉི་ཤུ་ཐམ་པར་ཀུན་མཁྱེན་མཆོག་ལས་བསྙེན་པར་རྫོགས། དགུང་ལོ་ཉེར་གཉིས་པར་དབུས་སུ་ཕེབས་ཏེ་འབྲས་སྤུངས་སྒོ་མང་གྲྭ་ཚང་གི་ཆོས་སྒོར་ཞུགས་ནས་གཞུང་བཀའ་པོད་ལྔ་ལ་བསྐྱར་སྦྱངས་མཛད་ཅིང་སྨོན་ལམ་ཆེན་མོའི་གྲྭ་སྐོར་མཛད། རྒྱལ་ཚབ་ཚ་རྡོར་ནོ་མིན་ཧན་དང་། ཁྲི་ཆེན་འཇམ་དཔལ་ཚུལ་ཁྲིམས། རྟ་ཚག་རྗེ་དྲུང་། པྲ་ཏི་བློ་བཟང་འཇམ་དཔལ། གུང་རུ་བློ་གྲོས་བསྟན་པ་བཅས་ལས་ཟབ་ཆོས་མང་དུ་གསན། དགུང་ལོ་ཉེར་དགུ་པར་མདོ་སྨད་དུ་ཕེབས་ཤིང་ཡུན་རིང་མ་བཞུགས་པར་ཧོ་ཤུལ་དགོན་པ་སོགས་སུ་བྱོན་ནས་བཀའ་ཆོས་གསུངས། དགུང་ལོ་སོ་ལྔ་པར་པེ་ཅིན་དུ་ཕེབས་ཏེ་ཙན་དན་ཇོ་བོ་བཅས་མཆོད་འབུལ་མཛད། དགུང་ལོ་སོ་བརྒྱད་པ་རབ་བྱུང་བཅུ་བཞི་པའི་ཤིང་ཕོ་སྟག་ལོ་སྟེ་སྤྱི་ལོ 1854 ལོར་བླ་བྲང་བཀྲ་ཤིས་འཁྱིལ་གྱི་གདན་སའི་ཁྲི་ལ་བཞུགས་ནས་ལོ་བརྒྱད་ཀྱི་རིང་དུ་གདན་ས་བསྐྱངས་ཤིང་འཆད་ཉན་དང་གཏོང་སྒོ་གང་ཡོད་ཡར་ལྡན་དུ་མཛད། བཅའ་ཡིག་གསར་བཞག་མཛད། ཁྲི་ཟུར་ནས་བཤད་སྒྲུབ་ལེགས་མཛད་གོང་དུ་སྤེལ་ཞིང་བསྟན་འགྲོའི་དོན་ཆེན་འབའ་ཞིག་སྒྲུབ་ནས་དུས་འདའ་བའོ། ཁོང་ནི་བླ་བྲང་བཀྲ་ཤིས་འཁྱིལ་གྱི་གདན་རབས་ཞེ་བདུན་པ་ཡིན་ནོ། །

Further Details