1. gangs can mkhas grub rim byon ming mdzod

ཁོང་ནི་རབ་བྱུང་བཅུ་གཅིག་པའི་ཆུ་མོ་གླང་ལོ་སྟེ་སྤྱི་ལོ 1673 [915] ལོར་མདོ་སྨད་ཁྲི་ཀའི་ལན་ཀྱོར་ཡབ་ལྟག་རིང་དགེ་བསྙེན་གྱི་སྲས་སུ་སྐུ་འཁྲུངས། རབ་བྱུང་བཅུ་གཉིས་པའི་མེ་ཕོ་སྟག་ལོ་སྟེ་སྤྱི་ལོ 1746 ལོར་སྐུ་གཤེགས། ཁོང་དགུང་ལོ་ལྔ་པར་ལ་མོ་བདེ་ཆེན་དགོན་དུ་ཕེབས་ཏེ་ཁུ་བོ་རབ་འབྱམས་པ་ལས་ཡི་གེའི་སྦྱོར་ཀློག་དང་འདོན་ཆོག་ཆོས་སྤྱོད་བཅས་ལ་བྱང་བར་མཛད། དགུང་ལོ་བཅུ་དྲུག་པར་དབུས་སུ་ཕེབས་ཏེ་འབྲས་སྤུངས་སྒོ་མང་གྲྭ་ཚང་གི་ཆོས་སྒོར་ཞུགས་ཤིང་བྱ་བྲལ་དགེ་འདུན་ཕུན་ཚོགས་དང་། རྒྱལ་སྲས་དོན་གྲུབ་རྒྱ་མཚོ། ཏཱ་དབོན་ཀུན་དགའ་འོད་ཟེར་བཅས་ལ་བསྟེན་ཏེ་གཞུང་བཀའ་པོད་ལྔ་ལ་སྦྱངས་པ་དཔྱིས་ཕྱིན་པ་མཛད་ཅིང་། དགུང་ལོ་ཉེར་བཞི་པར་ལྷ་སའི་སྨོན་ལམ་ཆེན་མོའི་གྲྭ་སྐོར་མཛད། ཀུན་མཁྱེན་འཇམ་དབྱངས་བཞད་པ་ལས་བསྙེན་པར་རྫོགས། རྒྱལ་བ་ཚངས་དབྱངས་རྒྱ་མཚོའི་སྐུ་མདུན་པ་མཛད་ཅིང་རྒྱལ་པོ་ལྷ་བཟང་ཧན་གྱིས་ཀྱང་ཐུགས་འདིངས་ཆེན་པོ་ཡོད། དགུང་ལོ་ཉེར་བརྒྱད་པར་ཀུན་མཁྱེན་འཇམ་དབྱངས་བཞད་པའི་ཕྱག་མཛོད་མཛད། དགུང་ལོ་སོ་བདུན་པར་ཀུན་མཁྱེན་འཇམ་དབྱངས་བཞད་པའི་ཞབས་ཕྱིར་མདོ་སྨད་དུ་ཕེབས་ཏེ་ཕྱག་མཛོད་ཀྱི་འགན་ཁུར་བཞེས། དགུང་ལོ་ང་བརྒྱད་པར་བླ་བྲང་བཀྲ་ཤིས་འཁྱིལ་གྱི་རྒྱུད་པའི་ཁྲི་ལ་བཞུགས་ནས་ལོ་བདུན་གྱི་རིང་དུ་འཆད་ཉན་མཛད། རྒྱུད་ཁང་གསར་དུ་བཞེངས། དགུང་ལོ་རེ་གསུམ་པ་རབ་བྱུང་བཅུ་གཉིས་པའི་ས་མོ་ལུག་ལོ་སྤྱི་ལོ 1739 ལོར་བླ་བྲང་བཀྲ་ཤིས་འཁྱིལ་གྱི་གདན་སའི་ཁྲི་ལ་ཕེབས་ནས་ལོ་དགུའི་རིང་དུ་གདན་ས་བསྐྱངས། དགོན་པའི་འགྲིག་ལམ་ཀུན་སྤྱོད་དང་ཆོས་[916]འཆད་ཉན་བཅས་ཀྱི་ཐད་ལ་དོ་དམ་གང་ལེགས་གནང་། ཀུན་མཁྱེན་འཇམ་དབྱངས་བཞད་པའི་བསྟན་པ་གོང་ནས་གོང་དུ་འཕེལ་བ་མཛད། ལུང་རྟོགས་གཉིས་ཀའི་བདག་ཉིད་ཅན་གྱི་སྐྱེས་ཆེན་དམ་པ་ཞིག་ཡིན། ཁྲི་ཟུར་ནས་སྒྲུབ་པ་ཉམས་ལེན་ཁོ་ནས་དུས་འདའ་བ་མཛད་དོ། ཁོང་གིས་བསྟན་འགྲོའི་དོན་ཆེན་ལེགས་པར་གྲུབ་སྟེ་དགུང་ལོ་དོན་བཞི་པར་དགོངས་པ་ཆོས་དབྱིངས་སུ་གཤེགས། ཁོང་ནི་བླ་བྲང་བཀྲ་ཤིས་འཁྱིལ་གྱི་གདན་སའི་ཁྲི་རབས་གསུམ་པ་ཡིན་ནོ། ཁོང་གི་སློབ་མ་གྲགས་ཆེ་བ་ནི་ཨ་བར་དཀའ་བཅུ་དཀོན་མཆོག་རྒྱ་མཚོ་དང་། བློ་བཟང་སྙན་གྲགས། སྨྲ་བའི་དབང་ཕྱུག་བསོད་ནམས་དབང་རྒྱལ། གྲུབ་དབང་བསོད་ནམས་གྲགས་པ། ཁྲི་ཆེན་རབ་བརྟན་རྒྱ་མཚོ། མཁས་དབང་བློ་བཟང་རིན་ཆེན། བྲག་དཀར་དཔོན་སློབ་ཀུན་དགའ་བཀྲ་ཤིས་བཅས་ཡིན་ནོ། །

Further Details