1. gangs can mkhas grub rim byon ming mdzod

ཁོང་ནི་རབ་བྱུང་དགུ་པའི་མེ་ཕོ་ཁྱི་ལོ་སྟེ་སྤྱི་ལོ 1526 ལོར་[784]སྟོད་ལུང་རན་པར་སྡེ་པ་གད་པ་ཁ་པའི་སྲས་སུ་སྐུ་འཁྲུངས། རབ་བྱུང་བཅུ་པའི་ས་མོ་ཕག་ལོ་སྟེ་སྤྱི་ལོ 1599 ལོར་སྐུ་གཤེགས། ཁོང་གཞོན་ནུའི་དུས་ནས་མཁས་པའི་ཕུལ་དུ་ཕྱིན་པས་ར་བ་སྟོད་ཀྱི་འཆད་ཉན་པ་མཛད་མུས་རྒྱུད་སྟོད་པའི་བླ་མ་དང་། འཁོར་ཚོགས་རྒྱ་མཚོས་བསྐོར་བའི་དབུས་སུ་མངོན་པར་མཐོ་བ་དང་བཅས་འོལ་དགར་ཕེབས། དགའ་ལྡན་ཤར་དང་རྒྱུད་སྦྲེལ་བའི་བླ་མ་མཛད། དགུང་ལོ་ལྔ་བཅུ་ང་བདུན་པ་རབ་བྱུང་བཅུ་པའི་ཆུ་ཕོ་རྟ་ལོ་སྟེ་སྤྱི་ལོ 1582 ལོར་དགའ་ལྡན་གསེར་ཁྲི་ལ་ཕེབས་ནས་ལོ་ངོ་བརྒྱད་ཀྱི་རིང་དུ་གསེར་ཁྲི་བསྐྱངས་ཤིང་མདོ་སྔགས་ཆོས་ཀྱི་འཆད་ཉན་མཛད། གཟིམས་ཁང་ཆེན་མོའི་ཞིག་གསོ་དང་ལྡེབས་བྲིས་གནང་། ལྷ་ས་སྨོན་ལམ་ཆེན་མོའི་གྲལ་དབུ་རྒྱུན་དུ་མཛད། དགུང་ལོ་དྲུག་ཅུ་རེ་བཞི་པར་རྒྱལ་ཁང་རྩེར་ཟུར་བཞུགས་མཛད་པས་ཆོས་རྗེ་རྒྱལ་ཁང་རྩེ་བར་འབོད། དེ་ནས་སོག་ཡུལ་དུ་ཕེབས་ཏེ་གདུལ་བྱ་རྣམས་ལ་ཆོས་ཀྱི་འཁོར་ལོ་ལེགས་པར་བསྐོར། ཆོས་སྡེ་ཆེན་པོ་སྐྱོར་མོ་ལུང་དང་། ཕག་མོ་ཆོས་སྡེ། འབར་ཚག་ཆོས་སྡེ། དཔལ་འབར། ཐང་སྐྱ། རིན་ཆེན་གླིང་སོགས་ཀྱི་ཞལ་འཛིན་མཛད། དགུང་ལོ་བདུན་ཅུ་དོན་བཞི་པར་དགོངས་པ་ཆོས་དབྱིངས་སུ་གཤེགས། དགོངས་རྫོགས་ཀྱི་ཕྱིར་དུ་དངུལ་གྱི་ལྷ་བབས་མཆོད་རྟེན་བཞེངས་ཏེ་ལི་མ་ལྷ་ཁང་ཤར་གྱི་གཙོ་བོའི་གཡས་དང་པོར་བཞུགས་ཤིང་དུས་མཆོད་ཀྱང་ཚུགས་སོ། ཁོང་ནི་དགའ་ལྡན་གསེར་ཁྲི་འཛིན་པའི་ཁྲི་རབས་ཉི་ཤུ་རྩ་ལྔ་པ་ཡིན་ནོ།།

Further Details