1. gangs can mkhas grub rim byon ming mdzod

ཁོང་ནི་རབ་བྱུང་ལྔ་པའི་ས་ཕོ་བྱི་ལོ་སྟེ་སྤྱི་ལོ 1288 ལོར་གཡང་ཤོད་བོང་ར་སྟེངས་སུ་ཡབ་ཐུགས་རྗེ་སྐྱབས་དང་ཡུམ་གཟུངས་ལྕམ་གྱི་སྲས་སུ་སྐུ་འཁྲུངས། རབ་བྱུང་དྲུག་པའི་ས་མོ་ཡོས་ལོ་སྟེ་སྤྱི་ལོ 1339 ལོར་སྐུ་གཤེགས། མཁན་ཆེན་བསོད་ནམས་ཡེ་ཤེས་དང་། སློབ་དཔོན་སེང་གེ་བཟང་པོ་གཉིས་ལས་རབ་ཏུ་བྱུང་། དགུང་ལོ་བཅུ་དྲུག་པར་འཇམ་དབྱངས་རིན་ཆེན་རྒྱལ་མཚན་དང་མཇལ་ཞིང་དམ་ཆོས་མང་དུ་གསན། དགུང་ལོ་བཅུ་དགུ་པར་སྟག་ལུང་དུ་ཕེབས་ཏེ་ཆོས་རྗེ་སངས་རྒྱས་དཔལ་བཟང་པོ་དང་མཇལ་ནས་ཀྱེ་རྡོར་དང་། བདེ་མཆོག གཤིན་རྗེ་དགྲ་ནག་གདོང་དྲུག་ལ་སོགས་པའི་བཀའ་མང་པོ་དང་། ནཱ་རོ་ཆོས་དྲུག་ལ་སོགས་པའི་ཆོས་བཞུགས་པ་ཐམས་ཅད་གསན། དགུང་ལོ་ཉེར་གཉིས་པ་རབ་བྱུང་ལྔ་པའི་ས་མོ་བྱ་ལོ་སྟེ་སྤྱི་ལོ 1309 ལོར་སྟག་ལུང་དགོན་པའི་གདན་སར་ཕེབས། ལོ་དེར་ས་སྐྱར་བྱོན་ནས་འཇམ་དབྱངས་པ་དང་། བདག་ཉིད་ཆེན་པོ། གྲགས་པ་རྒྱལ་མཚན། ཀུན་དགའ་སེང་གེ་རྣམས་ལ་བསྟེན་ནས་ཆོས་མང་དུ་གསན། དེ་ནས་ཇོ་མོ་ནང་དུ་ཕེབས་ཤིང་ཀུན་སྤངས་ཐུགས་རྗེ་བརྩོན་འགྲུས་དང་མཇལ་ནས་བྱིན་རླབས་ཞུས། ཀུན་སྤངས་ཐུགས་རྗེ་བརྩོན་འགྲུས་[765]ཀྱིས་མཁན་པོ་དང་། བསྟན་པའི་རྒྱལ་མཚན་གྱིས་སློབ་དཔོན། ཀུན་མཁྱེན་ཡོན་ཏན་རྒྱ་མཚོས་གསང་སྟོན་མཛད་དེ་བསྙེན་པར་རྫོགས། མཁན་པོ་ལས་དུས་འཁོར་གྱི་དབང་ཆེན་དང་། སྦྱོར་དྲུག་ལ་སོགས་པ་གདམས་ངག་དཔག་ཏུ་མེད་པ་གསན་ཅིང་ཡོན་ཏན་ཁྱད་པར་ཅན་འཁྲུངས། དེ་ནས་ཁྱི་ལོ་སྟེ་སྤྱི་ལོ 1310 ལོར་གདན་སར་ཕྱིར་ཕེབས། ལོ་ངོ་སུམ་ཅུ་ཐམ་པའི་རིང་དུ་གདན་ས་བསྐྱངས་ནས་གསེར་འབུམ་བཞེངས་པ་ལ་སོགས་པའི་བྱ་བ་རྒྱ་ཆེན་པོ་མཛད་ཙིང་། དགུང་ལོ་ལྔ་བཅུ་རྩ་གཉིས་པར་དགོངས་པ་ཆོས་དབྱིངས་སུ་འཐིམས་སོ། ཁོང་ནི་སྟག་ལུང་དགོན་པའི་གདན་རབས་དྲུག་པ་ཡིན།

Further Details