1. gangs can mkhas grub rim byon ming mdzod

ཁོང་ནི་རབ་བྱུང་ལྔ་པའི་ཤིང་ཕོ་སྤྲེལ་ལོ་སྟེ་སྤྱི་ལོ 1284 ལོར་ཡུལ་ལོ་རོ་ལ་སྐུ་འཁྲུངས། རབ་བྱུང་དྲུག་པའི་ས་ཕོ་སྟག་ལོ་སྟེ་སྤྱི་ལོ 1338 ལོར་སྐུ་གཤེགས། ཁོང་ཟངས་པོ་ཆེ་བ་དང་མཚོ་སྣ་བ་གཉིས་ལས་དགེ་ཚུལ་གྱི་སྡོམ་པ་མནོས་ཤིང་མཚན་ལ་ཚུལ་ཁྲིམས་ཤེས་རབ་ཅེས་གསོལ། འདུལ་བ་ལ་སོགས་པའི་ཆོས་སྐོར་རྣམས་ལ་གསན་པ་རྒྱ་ཆེར་མཛད། དེ་ནས་བྱ་ཡུལ་དུ་ཕེབས་ཤིང་སངས་རྒྱས་ཇོ་བོ་དབང་ཕྱུག་གཞོན་ནུ་སོགས་ལས་བསྙེན་པར་རྫོགས། སངས་རྒྱས་སྟོན་པ་ཚུལ་ཁྲིམས་སེང་གེ་ལས་བྱ་ཡུལ་པའི་ཆོས་སྐོར་ཐམས་ཅད་ལེགས་པར་ཞུས་ཤིང་སྒྲུབ་པ་ཉམས་ལེན་མཛད་པས་རྟོགས་པ་ཁྱད་པར་ཅན་ཐུགས་རྒྱུད་ལ་འཁྲུངས། དེའི་དུས་སུ་གསང་སྔགས་བཀའ་བབས་ཀྱི་སྐོར་ཁམས་པ་ལུང་པ་རིན་ཆེན་སེང་གེ་ནས་བཀའ་ཆད་དེ་མེད་པར་གྱུར་བས། མོན་ལུག་མགོ་སྟེངས་སུ་ཟེམ་ཚེ་རིང་མོ་བའི་སློབ་མ་སྒོམ་པ་བྱང་སྐྱབས་བཞུགས་པ་ལས་བཀའ་ཐམས་ཅད་རྫོགས་པར་བླངས་ཏེ་གདམས་ངག་གི་ཕྱུག་པོར་གྱུར། དགུང་ལོ་བཞི་བཅུ་ཞེ་གསུམ་པ་རབ་བྱུང་ལྔ་པའི་མེ་ཕོ་སྟག་ལོ་སྟེ་སྤྱི་ལོ 1326 ལོར་བྱ་ཡུལ་དགོན་གྱི་[1735]གདན་སར་ཕེབས་ཤིང་ལོ་ངོ་བཅུ་གསུམ་གྱི་རིང་དུ་གདན་ས་བསྐྱངས་ཏེ་བསྟན་འཛིན་གྱི་སྐྱེས་བུ་མང་དུ་གསོ་སྐྱོང་མཛད་དེ་འཕྲིན་ལས་ཤིན་ཏུ་རྒྱས་པར་གྱུར། དེ་ནས་བསྟན་འགྲོའི་དོན་ཆེན་ལེགས་པར་གྲུབ་སྟེ་དགུང་ལོ་ལྔ་བཅུ་རྩ་ལྔ་པར་དགོངས་པ་ཆོས་དབྱིངས་སུ་གཤེགས། ཁོང་ནི་བྱ་ཡུལ་དགོན་གྱི་གདན་རབས་བཅུ་པ་ཡིན་ནོ། །

Further Details