Skip to main content Skip to search
lha lung gi dbang phyug byang chub rin chen
ID:
T273463
  • ལྷ་ལུང་གི་དབང་ཕྱུག་བྱང་ཆུབ་རིན་ཆེན (Tibetan, Tibetan script, Original)
    • > lha lung gi dbang phyug byang chub rin chen (Tibetan, Latin script, Transliteration-THL Extended Wylie Transliteration)
    • > lhalunggi wangchuk jangchup rinchen (Tibetan, Latin script, Transcription-THL Simplified Tibetan Transcription)
Other Dictionaries

Other Dictionaries

1. gangs can mkhas grub rim byon ming mdzod

ཁོང་ནི་རབ་བྱུང་གསུམ་པའི་ས་ཕོ་སྟག་ལོ་སྟེ་སྤྱི་ལོ 1158 ལོར་ཡབ་ཇོ་བོ་རྣལ་འབྱོར་དང་། ཡུམ་སྣ་ནམ་བཟའ་དཔལ་འདྲེན་གཉིས་ཀྱི་སྲས་སུ་སྐུ་འཁྲུངས། རབ་བྱུང་བཞི་པའི་ཆུ་ཕོ་འབྲུག་ལོ་སྟེ་སྤྱི་ལོ 1232 ལོར་སྐུ་གཤེགས། ཁོང་དགུང་ལོ་བརྒྱད་པར་གུ་རི་བ་ཆེན་པོ་ལས་བསྙེན་གནས་དང་གཏོར་ཆོག་ལ་སོགས་པའི་ལུང་ཞུས། དགུང་ལོ་བཅུ་བཞི་པར་དགེ་བསྙེན་གྱི་སྡོམ་པ་མནོས། དགུང་ལོ་བཅོ་ལྔ་པར་རྒྱ་དུར་གྱི་མཁན་པོ་ཀླུབས་དཀར་དང་། མཆིམས་ཕུའི་དགེ་བཤེས་གཙང་པ་ཁྱུང་པོ་གཉིས་ལས་རབ་ཏུ་བྱུང་ཞིང་མཚན་ལ་བྱང་ཆུབ་རིན་ཆེན་དུ་གསོལ། མཁན་སློབ་དེ་གཉིས་ལས་ཀཱ་རི་ཀཱ་དང་སུམ་བརྒྱ་པ་ཚར་གཉིས་གསན་པས་མཁས་པར་གྱུར། དེ་ནས་སེ་སྤྱིལ་བུ་བ་ཆོས་ཀྱི་རྒྱལ་མཚན་ཞབས་ལ་གཏུགས་ཤིང་གདམས་ངག་མ་ལུས་པར་ཞུས་ཏེ་རྟོགས་པར་མངའ་བརྙེས། དགུང་ལོ་ཉི་ཤུ་རྩ་བཞི་པར་མཁན་པོ་གླན་དང་། སློབ་དཔོན་ཞང་། གསང་སྟོན་གཉགས་ཀྱིས་མཛད་ཅིང་བརྙེན་པར་རྫོགས། ཁ་ཆེ་པཎ་ཆེན་ལ་སོགས་པའི་བླ་མ་མང་དུ་བསྟེན་ནས་མདོ་སྔགས་རིག་གནས་དང་བཅས་པར་སྦྱངས་པ་དཔྱིས་ཕྱིན་པར་མཛད། བྱང་ཆུབ་ཀྱི་སེམས་རླབས་པོ་ཆེ་མངའ་ཞིང་དོན་ཡོད་ཞགས་པ་ལ་སོགས་པའི་ཡི་དམ་མང་པོའི་ཞལ་གཟིགས། བཀའ་འགྱུར་རོ་ཅོག་གི་ལུང་མངའ་བས་ལུང་གི་དབང་ཕྱུག་ཅེས་གྲགས་སོ། སེ་སྤྱིལ་བུ་བ་ཆོས་ཀྱི་རྒྱལ་མཚན་སྐུ་གཤེགས་རྗེས། རབ་བྱུང་གསུམ་པའི་ལྕགས་ཕོ་ཁྱི་ལོ་སྟེ་སྤྱི་ལོ 1190 ལོ་ནས་རབ་བྱུང་བཞི་[1873]པའི་ཆུ་ཕོ་འབྲུག་ལོ་སྟེ་སྤྱི་ལོ 1232 ལོའི་བར་དུ་ལོ་ངོ་བཞི་བཅུ་རྩ་གསུམ་གྱི་རིང་དུ་འཆད་ཁ་གསར་མ་དགོན་དང་སྤྱིལ་བུའི་དགོན་གྱི་གདན་ས་བསྐྱངས་ཤིང་བསྟན་འཛིན་སྐྱེས་བུ་མང་དུ་གསོ་སྐྱོང་མཛད། དེ་ནས་བསྟན་འགྲོའི་དོན་ཆེན་ལེགས་པར་གྲུབ་ཅིང་། དགུང་ལོ་བདུན་ཅུ་རྩ་ལྔ་པར་དགོངས་པ་ཆོས་དབྱིངས་སུ་གཤེགས། ཁོང་ནི་འཆད་ཁ་གསར་མའི་གདན་རབས་གཉིས་པ་ཡིན།

language:
Tibetan