1. gangs can mkhas grub rim byon ming mdzod

ཁོང་ནི་རབ་བྱུང་བཅུ་གཅིག་པའི་མེ་ཕོ་རྟ་ལོ་སྟེ་སྤྱི་ལོ 1666 ལོར་མདོ་སྨད་ཤིང་རུ་སྡེ་བར་སྐུ་འཁྲུངས། རབ་བྱུང་བཅུ་གཉིས་པའི་ཆུ་མོ་ཡོས་ལོ་སྟེ་སྤྱི་ལོ 1723 ལོར་ཉན་ཀང་ཡོའི་དམག་གིས་བཀྲོངས། ཁོང་དགུང་ལོ་ཆུང་ངུའི་དུས་ནས་རབ་ཏུ་བྱུང་ཞིང་གསེར་ཁོག་དགོན་གྱི་ཆོས་སྒོར་ཞུགས་ཏེ་མཚན་ཉིད་ཀྱི་གཞུང་ལ་སྦྱངས་པ་མཛད། དེ་[881]ནས་དབུས་སུ་བྱོན་ཏེ་གྲྭ་ས་ཆེན་མོ་ཁག་ནས་མདོ་སྔགས་རིག་གནས་དང་བཅས་པར་སྦྱངས་པ་དཔྱིས་ཕྱིན་པ་མཛད། དེ་ནས་མདོ་སྨད་དུ་བྱོན་ཏེ་ཟབ་ལུང་ཕྱོགས་སུ་དབེན་པའི་ནགས་ཁྲོད་དུ་བཞུགས་ནས་སྒྲུབ་པའི་རྒྱལ་མཚན་བཙུགས། ཀུན་མཁྱེན་འཇམ་དབྱངས་བཞད་པས་དགོན་ལུང་བྱམས་པ་གླིང་དུ་རྒྱུད་པའི་གྲྭ་ཚང་བཙུགས་སྐབས་རྗེ་འདི་བ་བླ་མར་བསྐོ་བཞག་མཛད། རྒྱུད་ཀྱི་འཆད་ཉན་དང་རི་ཁྲོད་བྱང་ཆུབ་གླིང་དུ་བཀའ་འགྱུར་གྱི་བཀླགས་ལུང་གནང་། དེ་རྗེས་གསེར་ཁོག་དགོན་པའི་མཚན་ཉིད་ཀྱི་སློབ་དཔོན་མཛད། རབ་བྱུང་བཅུ་གཉིས་པའི་ཆུ་མོ་ཡོས་ལོ་སྟེ་སྤྱི་ལོ 1723 ལོར་དགོན་ལུང་བྱམས་པ་གླིང་གི་གདན་སའི་ཁྲི་ལ་བཞུགས་ནས་ཡུན་རིང་མ་འགོར་བར་དུས་ཟིང་ལངས་ཏེ་འཆད་ཉན་གྱི་མཛད་སྒོ་ཉིན་གཅིག་ཀྱང་གནང་རྒྱུ་མ་བྱུང་། བསྟན་འཛིན་ཆིང་ཝང་གིས་དུས་ཟིང་སློང་སྐབས་བཙན་པོ་དགོན་གྱི་སོག་པོའི་གྲྭ་བ་སེ་ཆེན་རབ་འབྱམས་པས་སེར་དམག་ཉུང་ཤས་ཁྲིད་ནས་གོང་མའི་དམག་ལ་འཐབ་འཛིངས་བྱས་པའི་རྐྱེན་གྱིས་གསེར་ཁོག་དགོན་དང་། ཞྭ་བོ་ཁོག་གི་དགོན་པ་གསུམ། འཇུ་ལག་གི་རྒྱལ་ལྡོག་དགོན། སེམས་ཉིད་དགོན། ཕོ་རོད་ཀྱི་པྲ་སྟི་དགོན། དགོན་ལུང་བྱམས་པ་གླིང་བཅས་མེ་ལ་བསྲེགས། ཆུ་བཟང་རིན་པོ་ཆེ་བློ་བཟང་བསྟན་པའི་རྒྱལ་མཚན་དང་། མཁན་པོ་ལས་ཐོག་པ་འདན་མ་ངག་དབང་བསྟན་འཛིན་འཕྲིན་ལས་ལ་སོགས་པའི་ཉེས་མེད་གྲྭ་བ་བརྒྱ་ཕྲག་དུ་མ་སྲོག་ཐོག་བཏང་། དེའི་སྐབས་སུ་ཐུའུ་བཀྭན་ངག་དབང་ཆོས་ཀྱི་རྒྱ་མཚོ་དང་ལྕང་སྐྱ་རོལ་བའི་རྡོ་རྗེ་རྣམ་[882]གཉིས་ཀྱིས་གོང་མ་ཡུང་ཊིང་ལ་ཐབས་མཁས་ཀྱིས་ཞུ་བ་དང་མཛད་སྒོ་གང་ཟབ་གནང་བའི་བཀའ་དྲིན་ལས་རབ་བྱུང་བཅུ་གཉིས་པའི་ས་མོ་བྱ་ལོ་སྟེ་སྤྱི་ལོ 1729 ལོ་ནས་བཟུང་དགོན་ཁག་སོ་སོ་གསར་བཞེངས་ཆོག་པའི་བཀའ་ལུང་ཐོབ་ཅིང་། རྒྱལ་པོའི་མཛོད་ནས་གྲྭ་བ་རྣམས་ལ་ཕོག་དང་གཙུག་ལག་ཁང་སོགས་བཞེངས་པའི་གྲོན་དངུལ་རྣམས་བཀའ་དྲིན་དུ་བསྩལ། དེ་ནས་བཟུང་དགོན་ཁག་སོ་སོའི་འཆད་ཉན་གྱི་མཛད་སྒོ་གོང་ནས་གོང་དུ་འཕེལ་བར་གྱུར། ཁོང་ནི་དགོན་ལུང་བྱམས་པ་གླིང་གི་གདན་སའི་མཁན་རབས་ཉི་ཤུ་རྩ་དྲུག་པ་ཡིན་ནོ།།

Further Details