1. gangs can mkhas grub rim byon ming mdzod

ཁོང་ནི་སྤྱི་ལོའི་དུས་རབས་བཅོ་བརྒྱད་པའི་དུས་དཀྱིལ་ཙམ་དུ་མདོ་བ་ཡར་ནང་དུ་སྐུ་འཁྲུངས། ཁོང་དགུང་ལོ་ཉེར་དྲུག་བར་དུ་བྱ་ཁྱུང་དགོན་པའི་སྤྱི་སོའི་རང་འཐག་པ་མཛད་ཅིང་དཔེ་ཆ་ལ་གཟིགས་ཁོམ་དེ་འདྲ་མ་བྱུང་། དགུང་ལོ་ཉེར་བདུན་པར་དབུས་སུ་ཕེབས་ཏེ་སེ་ར་ཐེག་ཆེན་གླིང་གི་བྱེས་པ་གྲྭ་ཚང་དུ་ཞུགས་ཤིང་ལོ་ཉེར་གཉིས་ཀྱི་རིང་དུ་པཎ་ཆེན་དཔལ་ལྡན་ཡེ་ཤེས (1738—1780) དང་། [874] དཀའ་ཆེན་ཡོངས་འཛིན། དགེ་བཤེས་ཐོགས་མེད། བླ་མ་འཇམ་དབྱངས་པ། ཀོང་ཡེ་དཀའ་བཅུ་སོགས་ལ་བསྟེན་ནས་མདོ་སྔགས་རིག་གནས་དང་བཅས་པར་སྦྱངས་པ་དཔྱིས་ཕྱིན་པ་མཛད་དེ་སེར་བྱེས་གླིང་བསྲེའི་དཀའ་བཅུའི་མཚན་བཏགས་བཞེས། དེ་ནས་རྒྱལ་བ་འཇམ་དཔལ་རྒྱ་མཚོའི(1758—1804) བཀའ་ལུང་བཞིན་དུ་རྒྱ་ནག་པའི་ཡོངས་འཛིན་གྱི་འགན་ཁུར་བཞེས་ཏེ་ཕོ་བྲང་ཆེན་པོ་པེ་ཅིན་མཁར་དུ་ཕེབས་ཤིང་ལོ་བཅུར་བཞུགས་ནས་རང་ཡུལ་དུ་ཕེབས། དེ་ནས་བྱ་ཁྱུང་དགོན་པའི་དུས་འཁོར་དཔོན་སློབ་དང་རྒྱུད་པའི་མཁན་པོ་མཛད། རབ་བྱུང་བཅུ་བཞི་པའི་བགྲང་བྱ་གསུམ་པ་ས་མོ་སྦྲུལ་ལོ་སྟེ་སྤྱི་ལོ 1809 ལོར་བྱ་ཁྱུང་དགོན་པའི་གདན་སའི་ཁྲི་ལ་བཞུགས་ནས་ཆོས་ཀྱི་འཆད་ཉན་དང་དཔལ་འབྱོར་གྱི་གཏོང་སྒོ་བཅས་ཀྱི་ཐད་ནས་སྔར་སྲོལ་མ་ཉམས་པ་མཛད། ཁྲི་ཟུར་ནས་སྒྲུབ་པ་ཉམས་ལེན་ལ་བརྩོན་མུར་དགུང་ལོ་བརྒྱད་ཅུ་གྱ་བརྒྱད་པར་དགོངས་པ་ཆོས་དབྱིངས་སུ་གཤེགས། ཁོང་ནི་བྱ་ཁྱུང་དགོན་པའི་གདན་སའི་མཁན་རབས་ལྔ་བཅུ་ང་གཉིས་པ་ཡིན་ནོ། །

Further Details