1. gangs can mkhas grub rim byon ming mdzod

ཁོང་ནི་མྱང་སྨད་གཅུང་བ་ཡུ་བ་གདོང་དུ་ཡབ་རྒྱལ་པོ་ཆེ་འཕེལ་དང་། ཡུམ་རྒྱ་མོ་ཁྱེ་འདྲེན་དཔལ་གཉིས་ཀྱི་སྲས་སུ་སྐུ་འཁྲུངས། འཁྲུངས་ལོ་མི་གསལ། རབ་བྱུང་ལྔ་པའི་ས་མོ་ལུག་ལོ་སྟེ་སྤྱི་ལོ 1319 ལོར་སྐུ་གཤེགས། ཁོང་དགུང་ལོ་བཅུ་པར་སྣར་ཐང་གི་མཁན་ཆེན་ནམ་མཁའ་གྲགས་ཀྱི་དྲུང་དུ་རབ་ཏུ་བྱུང་། ཆུ་མིག་པ་ལ་སོགས་པའི་དྲུང་ནས་སྡེ་སྣོད་རྣམས་ལ་མཁས་པར་སྦྱངས། དགུང་ལོ་ཉི་ཤུ་པར་མཁན་ཆེན་ནམ་མཁའ་གྲགས་ལས་བསྙེན་པར་རྫོགས། དགུང་ལོ་ཉི་ཤུ་རྩ་གཉིས་པར་ས་སྐྱའི་བླ་མ་འཕགས་པའི་སྤྱན་སྔར་བྱོན་ནས་རྒྱུད་ཀྱི་བཤད་པ་མང་པོ་གསན། གཞན་ཡང་གདན་ས་ན་བཞུགས་པའི་དགེ་བཤེས་ཆེན་པོ་གཞན་རྣམས་ལའང་རྒྱུད་སྡེ་མང་པོ་གསན་ཞིང་མཁས་པར་མཁྱེན་ཏེ་སློབ་མ་མང་པོར་བསྐྱངས། ཁོང་གིས་སྤྱིར་བླ་མ་བརྒྱད་ཅུ་རྩ་གསུམ་བསྟེན་ནས་གདམས་ངག་ཟབ་དགུ་ཞུས་ནས་ཉམས་རྟོགས་ཆེན་པོར་འཕེལ། ཁྱད་པར་དུ་སངས་རྒྱས་སྟོན་པའི་དྲུང་དུ་ཕེབས་ནས་ཤངས་པ་བཀའ་བརྒྱུད་ཀྱི་གདམས་ངག་མ་ལུས་པ་དང་གཞན་ཡང་ཟབ་ཆོས་མང་དུ་བཞུགས་པ་རྣམས་གསན། ཁོང་གི་ཉམས་རྟོགས་བརྙེས་པ་ལའང་བླ་མ་ཤིན་ཏུ་དགྱེས། དབུས་གཙང་གི་ས་ཆ་མང་པོར་ལུས་སྲོག་བློས་བཏང་པའི་གཅོད་མཛད་ནས་ལྷ་འདྲེ་མང་པོའི་དོན་མཛད། དུས་ཕྱིས་སུ་མྱང་སྨད་དུ་[232]བསམ་སྡིངས་བཏབ་ཅིང་སློབ་མ་མང་པོར་ལམ་འབྲས་དང་། ཕྱག་ཆེན། ནི་གུའི་ཆོས་ཀྱིས་ཁྲིད་བཏབ། སྙན་གྲགས་ཀྱིས་ས་སྟེང་ཁྱབ་ཅིང་གདུལ་བྱ་ཡང་དཔག་ཏུ་མེད་པར་འདུས། སྦྱིན་བདག་གི་གཅོ་བོ་ཞ་ལུ་སྐུ་ཞང་པས་མཛད། བསྟན་འགྲོའི་དོན་ཆེན་ལེགས་པར་གྲུབ་ཅིང་དགོངས་པ་ཆོས་དབྱིངས་སུ་འཐིམས་སོ།།

Further Details