1. gangs can mkhas grub rim byon ming mdzod

ཁོང་ནི་རབ་བྱུང་བདུན་པའི་ལྕགས་མོ་གླང་ལོ་སྟེ་སྤྱི་ལོ1421ལོར་ཤབ་སྟག་ལ་དང་ཉེ་བའི་གྲོང་སྤོ་ཁར་ཞེས་པར་སྐུ་འཁྲུངས། [211] གདུང་རུས་དཀར་ཡིན། འདས་ལོ་མི་གསལ། ཁོང་གཞོན་ནུ་དུས་ནས་རབ་བྱུང་གི་སྡོམ་པ་མནོས། བཙུན་ཆུང་གི་དུས་ནས་ཐུགས་རབ་ཆེ་ཞིང་སྒོ་གསུམ་བག་དང་ལྡན་པ་ཞིག་ཡོད་པས། འདི་ལ་སྣར་ཐང་གི་མཁན་པོ་འོང་ཞེས་ཀུན་གྱིས་གླེང་བ་བྱུང་། དེ་ནས་རྗེ་དགེ་འདུན་གྲུབ་ཀྱི་ཞབས་ལ་གཏུགས་ནས་སྡེ་སྣོད་འཛིན་པ་ཆེན་པོར་གྱུར་ཏེ་རྩེ་ཐང་དུ་པོ་ཏི་བཅོ་བརྒྱད་ཀྱི་གྲྭ་སྐོར་མཛད། མཐིལ་དུ་བྱོན་ཏེ་ཆོས་རྗེ་བསོད་ནམས་མཆོག་གྲུབ་པ་དང་མཇལ། ཆོས་རྗེ་བྱམས་པ་གླིང་པ་ལས་སྒྲ་བསླབས། དེ་ནས་དགའ་ལྡན་དུ་བྱོན་ཏེ་རྒྱུད་ཆེན་སྦྱིན་པ་དཔལ་ལས་གསང་འདུས་ཀྱི་རྒྱུད་འགྲེལ་རྫོགས་པར་གསན། དེ་ནས་སླར་གཙང་དུ་བྱོན་ཏེ་སྣར་ཐང་དུ་མཚན་ཉིད་ཀྱི་འཆད་མཉན་མཛད། དེ་ནས་ཁོང་གིས་ཚེ་འདི་ལ་མཐོང་ལམ་ཐོབ་པ་ཞིག་བྱེད་གསུངས་ཏེ་འཆད་མཉན་གྱི་བྱ་བ་རྣམས་བཞག་སྟེ་བྱང་ཆུབ་ཆེན་པོའི་དབེན་གནས་དང་། རྐང་བཞི་ཕུའི་དབེན་གནས་སོགས་སུ་ཐུགས་དམ་གཙོ་བོར་མཛད། དེ་ནས་ཉེ་གནས་ཆེན་པོས་སྣར་ཐང་གི་མཁན་པོར་གདན་དྲངས་ཀྱང་ཕེབས་དཀའ་བར་བྱུང་བ་ལ། རྗེ་དགེ་འདུན་གྲུབ་ཀྱི་བཀའ་ལུང་ནན་གྱིས་ཕེབས་པ་བཟློག་མི་ནུས་པར་དགུང་ལོ་ང་གསུམ་བཞེས་པ་སྟེ། རབ་བྱུང་བརྒྱད་པའི་ཆུ་མོ་སྦྲུལ་ལོ་སྟེ་སྤྱི་ལོ 1473 ལོར་གདན་སའི་ཁྲི་ལ་ཕེབས། ལོ་ངོ་བཅུ་བཞིའི་བར་དུ་གདན་ས་བསྐྱངས། དེ་ནས་ཟུར་བཞུགས་མཛད་དེ་དབེན་པའི་གནས་སུ་ཐུགས་དམ་རྩེ་གཅིག་ཏུ་བཞུགས་སོ། ཁོང་ནི་དཔལ་སྣར་ཐང་དགོན་པའི་གདན་རབས་བཅུ་དགུ་པ་ཡིན།། [212]

Further Details