1. gangs can mkhas grub rim byon ming mdzod

[1272] ཁོང་ནི་རབ་བྱུང་བཅུ་གཉིས་པའི་ས་མོ་ཕག་ལོ་སྟེ་སྤྱི་ལོ 1719 ལོར་མདོ་སྨད་ཨ་རིག་ཆུ་སྨད་དུ་སྐུ་འཁྲུངས། རབ་བྱུང་བཅུ་གསུམ་པའི་ལྕགས་མོ་ཕག་ལོ་སྟེ་སྤྱི་ལོ 1719 ལོར་སྐུ་གཤེགས། ཁོང་དགུང་ལོ་ཆུང་ངུའི་དུས་ནས་རྫོང་དཀར་གྱི་གདན་སར་མངའ་གསོལ་ཞིང་སྐུ་དབོན་ལས་རབ་ཏུ་བྱུང་། ཁྲི་སྤྲུལ་བསྟན་པའི་ཉི་མ་དང་། རྗེ་བསྟན་འཛིན་འཕྲིན་ལས་སོགས་ལ་བསྟེན་ནས་གདམས་པའི་མཛོད་དུ་གྱུར། དཔོན་ཚང་ཆིང་ཝང་སྦྱིན་བདག་དང་སྐུ་བདག་གི་མཐིལ་དུ་སོང་བས་བླ་བྲང་བཀྲ་ཤིས་འཁྱིལ་གྱི་ཆོས་གྲྭར་ཞུགས་ཏེ་ཐོས་བསམ་གནང་། དེ་ནས་དབུས་སུ་ཕེབས་ཏེ་སྨོན་ལམ་ཆེན་མོར་དགེ་འདུན་ཁྲི་ར་ཅན་ལ་བསྙེན་བཀུར་དང་། བྱ་བྲལ་ཁམས་ཚན་བཟུང་སྟེ་འབྲས་སྒོ་མང་ཆོས་གྲྭར་ཞུགས་ནས་བཀའ་པོད་ལྔ་ལ་སྦྱངས་པས་མཁས་པར་གྱུར། རྒྱལ་བ་སྐལ་བཟང་རྒྱ་མཚོ་ལས་ཆོས་རྒྱུན་མང་དུ་ཞུས། པཎ་ཆེན་བློ་བཟང་ཡེ་ཤེས་ལས་བསྙེན་པར་རྫོགས། དེ་ནས་ཕྱིར་རྫོང་དཀར་དགོན་དུ་ཕེབས་ཏེ། རི་ཁྲོད་པ་ཉིས་བརྒྱར་ཉེ་བ་ལ་ཟླ་རེའི་ནང་དུ་དུས་བཟང་བརྒྱད་རེ། ལྔ་མཆོད། སྨྱུང་གནས། ཀླུ་དབང་རྒྱལ་བོ་རྣམས་ཀྱི་ཆོས་ཐོག་ལ་ཇ་འགྱེད་དང་། མར་འགྱེད། ཕོག་ཆེན། གྲོ་ནས་ཀྱི་ཕོག་སོགས་ཟམ་མི་འཆད་པ་དང་། ཞིང་བརྒྱ་ལྷག་ཕོག་འཐེབ་ཏུ་སྦྱོར་འཇགས་མཛད། འདུ་ཁང་དང་། བཙན་ཁང་གཉིས་གསར་དུ་བཞེངས། འཇམ་དབྱངས་ཀུན་གཟིགས་མི་ཚད་ཀྱིས་གཙོས་སྐུ་བརྙན་མང་པོ་གསེར་ཟངས་ལས་བཞེངས། གསེར་དངུལ་གཉིས་ཀྱིས་བཞེངས་པའི་བཀའ་འགྱུར་དང་བསྟན་འགྱུར། སྡེ་དགེ་ནས་བཀའ་[1273]བསྟན་འགྱུར་གཉིས་ཀ་གདན་དྲངས་པར་མཛད། དངུལ་སྲང་བརྒྱ་ཕྲག་མང་པོ་ལས་གྲུབ་པའི་མཆོད་རྟེན་གསར་དུ་བཞེངས་པ་སོགས་རྟེན་གསུམ་མང་དུ་བཞེངས་སོ། དེ་ལྟར་བསྟན་འགྲོའི་དོན་ཆེན་ལེགས་པར་གྲུབ་སྟེ་དགུང་ལོ་དོན་གསུམ་པར་དགོངས་པ་ཆོས་དབྱིངས་སུ་གཤེགས། ཁོང་ནི་མ་ཎི་བའི་སྐུ་ཕྲེང་གཉིས་པ་ཡིན་ནོ། །

Further Details