1. gangs can mkhas grub rim byon ming mdzod

ཁོང་ནི་རབ་བྱུང་གཉིས་པའི་ལྕགས་མོ་སྦྲུལ་ལོ་སྟེ་སྤྱི་ལོ 1101 ལོར་ཡུལ་ལུ་ར་ལ་སྐུ་འཁྲུངས། གདུང་རུས་བྱ་ཡིན། རབ་བྱུང་གསུམ་པའི་ཤིང་མོ་ལུག་ལོ་སྟེ་སྤྱི་ལོ 1175 ལོར་སྐུ་གཤེགས། ཁོང་དགུང་ལོ་གཞོན་པའི་དུས་སུ་ལོ་རོ་ཞིང་གསར་དུ་མཁན་པོ་རྩེ་བོར་བ་དང་སློབ་དཔོན་དྭགས་པོ་གཙང་འདུལ་བ་གཉིས་ལས་རབ་ཏུ་བྱུང་ཞིང་མཚན་ལ་ཡེ་ཤེས་རྡོ་རྗེ་ཞེས་གསོལ། ཚ་རོང་ཇོ་སྟན་དང་དྭགས་[1095]གཙང་འདུལ་བ་གཉིས་ལས་བསྙེན་རྫོགས་ཀྱི་སྡོམ་པ་མནོས། ཤ་མི་བ་སྨོན་ལམ་འབར་ལས་འདུལ་བ་ལ་སོགས་པའི་ཆོས་སྐོར་རྣམས་གསན། དགུང་ལོ་སུམ་ཅུ་ཐམ་པར་དབུ་རུར་བྱོན་ཏེ་ཤ་ར་བ་ཡོན་ཏན་གྲགས་མཇལ་ཞིང་བློ་སྦྱོང་གི་ཁྲིད་ཚར་གཅིག་ལ་ལོ་ངོ་བཅུ་གསུམ་གྱི་རིང་དུ་གསན་པས་ཇི་ལྟ་བ་བཞིན་དུ་ཐུགས་རྒྱུད་ལ་འཁྲུངས་ཤིང་། “བདག་ཉིད་མོས་པ་མང་བའི་རྒྱུས། བདེ་སྡུག་གཏམ་ངན་ཁྱད་བསད་ནས། བདག་འཛིན་འདུལ་བའི་གདམས་ངག་ཞུས། ད་ནི་ཤི་ཡང་མི་འགྱོད་དོ།” ཞེས་གསུངས། དེ་ནས་མལ་གྲོར་བྱོན་ཞིང་འཆད་ཁ་རྙིང་མ་གསར་འདེབས་མཛད་ཅིང་ལོ་ངོ་སུམ་ཅུ་རྩ་བཞིའི་རིང་དུ་ཚོགས་པ་བསྐྱངས། དེ་ནས་བྱ་དུར་མོར་བྱོན་ཞིང་སྒྲུབ་པ་ཉམས་ལེན་ཡང་མཛད་དེ་རྟོགས་པ་ཁྱད་པར་ཅན་རྒྱུད་ལ་འཁྲུངས། མཐར་ཐུག་གསུམ་གྱི་གདམས་པ་དང་། རང་རྣམ་ཚིགས་བཅད་མ་བཅས་བརྩམས་པ་མཛད། དེ་ནས་བསྟན་འགྲོའི་དོན་ཆེན་ལེགས་པར་གྲུབ་ཅིང་དགུང་ལོ་བདུན་ཅུ་དོན་ལྔ་པར་དགོངས་པ་ཆོས་དབྱིངས་སུ་གཤེགས། ཁོང་གི་སློབ་མ་མཆོག་ཏུ་གྱུར་པ་ནི་སེ་སྤྱིལ་བུ་བ་ཆོས་ཀྱི་རྒྱལ་མཚན་ཡིན། ཁོང་ནི་བཀའ་གདམས་པའི་དགེ་བཤེས་ཆེན་པོ་ཞིག་ཡིན་ནོ། །

Further Details