1. gangs can mkhas grub rim byon ming mdzod

ཁོང་ནི་རབ་བྱུང་བཅུ་བཞི་པའི་མེ་མོ་ལུག་ལོ་སྟེ་སྤྱི་ལོ 1847 ལོར་སྐུ་འབུམ་མཆོད་གཞིས་ཀླུ་འབུམ་ཚོ་བར་ཡབ་ཝང་ཀུན་ཟིན་བཧུན་ཞོ་དང་། ཡུམ་དཀར་མོ་སྐྱིད་གཉིས་ཀྱི་སྲས་སུ་སྐུ་འཁྲུངས། འདས་ལོ་མི་གསལ། ཁོང་ཧོར་ལྡིང་སྒོམ་པ་བློ་བཟང་དགེ་ལེགས་རྒྱལ་མཚན་གྱི་མདུན་ནས་རབ་ཏུ་བྱུང་ཞིང་སྐུ་འབུམ་རང་སྒར་དུ་གདན་སར་བཀོད། དགུང་ལོ་བཅུ་གཉིས་པར་ཉ་ཀྱཱ་ལྷ་རམས་པ་སློབ་དཔོན་དུ་བསྟེན་ནས་དཔལ་ལྡན་བཤད་སྒྲུབ་གླིང་གི་ཆོས་སྒོར་ཞུགས་ཏེ་གཞུང་བཀའ་པོད་ལྔ་ལ་ཐོས་བསམ་མཛད་ཅིང་ཚོགས་ལངས་ཀྱང་བཞེངས། [1087]དགུང་ལོ་བཅུ་དགུ་པར་སྐྱབས་རྗེ་ཤིང་བཟའ་རྡོ་རྗེ་འཆང་ལས་བསྙེན་པར་རྫོགས་ཤིང་རྒྱུད་པ་གྲྭ་ཚང་གི་ཆོས་སྒོར་ཞུགས་ནས་སྔགས་ཕྱོགས་ལ་སློབ་གཉེར་ལེགས་པར་གནང་། དགུང་ལོ་ཉི་ཤུ་ཐམ་པར་རྒྱུད་པའི་བླ་མ་དབུ་མཛད་བཞུགས། དགུང་ལོ་ཉེར་གཉིས་པ་རབ་བྱུང་བཅོ་ལྔ་པའི་ས་ཕོ་འབྲུག་ལོ་སྟེ་སྤྱི་ལོ 1868 ལོར་དུས་འཁོར་དཔོན་སློབ་ཀྱི་ཁྲི་ལ་བཞུགས། དགུང་ལོ་ཉེར་དྲུག་པ་རབ་བྱུང་བཅོ་ལྔ་པའི་ཆུ་ཕོ་སྤྲེལ་ལོ་སྟེ་སྤྱི་ལོ 1872 ལོར་རྒྱུད་པ་མཁན་པོའི་ཁྲི་ལ་བཞུགས་ནས་དུས་ཀྱི་དབང་དང་བསྟུན་པའི་འགྲིག་ལམ་གང་ཡོད་དང་ཆོས་འཆད་ཉན་གྱི་རིམ་པ་རྣམས་ལ་ཡར་རྒྱས་ཡོང་བའི་ཐབས་ཚུལ་ནན་ཏན་དུ་མཛད། ཁྲི་ཟུར་ནས་དབུས་གཙང་དག་པའི་ཞིང་དུ་འབྱོར་ཕྲལ་དགོངས་པ་རྫོགས་པའི་ཚུལ་བསྟན་ཏོ། ཁོང་ནི་སྐུ་འབུམ་དུས་འཁོར་དཔོན་སློབ་ཀྱི་ཁྲི་རབས་ཉེར་གཅིག་པ་དང་། རྒྱུད་པ་མཁན་པོའི་ཁྲི་རབས་ལྔ་བཅུ་ང་དགུ་པ་ཡིན་ནོ། །

Further Details