1. gangs can mkhas grub rim byon ming mdzod

ཁོང་གི་འཁྲུངས་ལོ་མི་གསལ། འཁྲུངས་ཡུལ་ནི་སྐུ་འབུམ་མཆོད་གཞིས་ཟི་ན་ཚོ་བ་ཡིན། རབ་བྱུང་བཅོ་ལྔ་པའི་ཤིང་ཕོ་ཁྱི་ལོ་སྟེ་སྤྱི་ལོ 1874 ལོར་སོག་ཡུལ་དུ་སྐུ་གཤེགས། ཁོང་གིས་སྒོ་མེ་རབ་འབྱམས་པ་ངག་དབང་བསམ་གཏན་སློབ་དཔོན་དུ་བསྟེན་ནས་སྐུ་འབུམ་དཔལ་ལྡན་བཤད་སྒྲུབ་གླིང་གི་ཆོས་སྒོར་ཞུགས་ཤིང་། བཀའ་པོད་ལྔའི་གཞུང་ལ་གསན་སྤྱོང་མཐར་ཕྱིན་མཛད་དེ་ཆོ་འཕྲུལ་སྨོན་ལམ་ཆེན་མོའི་སྟེང་དུ་སྨོན་ལམ་རབ་འབྱམས་པའི་མིང་བཏགས་བཞེས། དེ་ནས་དཔལ་ལྡན་གསང་སྔགས་རྒྱུད་པ་གྲྭ་ཚང་གི་ཆོས་སྒོར་ཞུགས་ཏེ་སྔགས་གཞུང་ཡན་ལག་དང་བཅས་པ་སྦྱངས། རབ་བྱུང་བཅུ་བཞི་པའི་ལྕགས་ཕོ་ཁྱི་ལོ་སྟེ་སྤྱི་ལོ 1850 ལོར་སྐུ་འབུམ་སྨན་པ་དཔོན་སློབ་ཀྱི་ཁྲི་ལ་བཞུགས་ནས་ལོ་ལྔའི་རིང་དུ་འགྲིག་ལམ་ཀུན་སྤྱོད་དང་ཆོས་འཆད་ཉན་བཅས་ལ་ཚགས་འཛིན་གང་ལེགས་གནང་། [110] རབ་བྱུང་བཅུ་བཞི་པའི་ཤིང་མོ་ཡོས་ལོ་སྟེ་སྤྱི་ལོ 1855 ལོར་སྐུ་འབུམ་རྒྱུད་པ་མཁན་པོའི་ཁྲི་ལ་བཞུགས་ནས་ལོ་བཞིའི་རིང་དུ་འཆད་ཉན་བསྐྱངས། རབ་བྱུང་བཅུ་བཞི་པའི་མེ་ཕོ་སྟག་ལོ་སྟེ་སྤྱི་ལོ 1866 ལོར་སྐུ་འབུམ་དགོན་གྱི་གདན་སའི་ཁྲི་ལ་བཞུགས་ནས་ལོ་གཉིས་ཀྱི་རིང་དུ་ཆོས་སྲིད་ཟུང་གིས་དུས་སྐབས་དང་བསྟུན་པའི་ཕྱག་སྲོལ་གང་ཡོད་ལེགས་པར་གནང་། སྐྱབས་རྗེ་ཨ་ཀྱཱ་རིན་པོ་ཆེ་ནས་ཞལ་བཀོད་མཛད་དེ་བཙན་ཁང་ཆེན་མོའི་ཕོ་བྲང་གི་དབུས་སུ་རྒྱ་མཐོངས་གདོང་སྐྱོར་དང་བཅས་པ་ཕྱུར་བུར་ཕུབ་པའི་སྟེང་དུ་གྱོ་མོ་གཡུའི་མདངས་ཅན་ལེགས་པར་བརྟད་ཅིང་རབ་གནས་གང་རྒྱས་མཛད། ཁྲི་ཟུར་ནས་སོག་ཡུལ་དུ་ཕེབས་ཏེ་ཆོས་ཀྱི་འཁོར་ལོ་རྒྱ་ཆེར་བསྐོར་ནས་བསྟན་འགྲོའི་དོན་ཆེན་ལེགས་པར་གྲུབ་ཅིང་དགོངས་པ་ཆོས་དབྱིངས་སུ་གཤེགས། ཁོང་ནི་སྐུ་འབུམ་སྨན་པ་དཔོན་སློབ་ཀྱི་ཁྲི་རབས་སོ་དྲུག་པ་དང་། རྒྱུད་པ་མཁན་པོའི་ཁྲི་རབས་ང་གསུམ་པ། སྐུ་འབུམ་དགོན་གྱི་གདན་རབས་ཁྲི་ཆེན་དྲུག་ཅུ་རེ་གཅིག་པ་བཅས་ཡིན་ནོ།།

Further Details