1. gangs can mkhas grub rim byon ming mdzod

ཁོང་ནི་རབ་བྱུང་བཅོ་ལྔ་པའི་ལྕགས་ཕོ་རྟ་ལོ་སྟེ་སྤྱི་ལོ 1870 ལོར་སྟོང་འཁོར་ཆ་གན་འོ་སུ་ཞེས་པའི་སྡེ་བར་ཡབ་དབང་ཕྱུག་ཚེ་རིང་གི་སྲས་སུ་སྐུ་འཁྲུངས། འདས་ལོ་མི་གསལ། ཁོང་དགུང་ལོ་བདུན་པར་རྒྱུད་པ་མཁན་པོ་ཨོར་ཏུ་སུ་ཞབས་དྲུང་ངག་དབང་མཁས་གྲུབ་ཉི་མའི་མདུན་ནས་བར་མ་རབ་བྱུང་བསྒྲུབས། དགུང་ལོ་བཅོ་བརྒྱད་པར་སྐུ་འབུམ་དགོན་དུ་ཕེབས་ཏེ་མཚན་སྒྲོག་མཁན་ཆེན་དགེ་འདུན་བསྟན་པའི་ཉི་མའི་མདུན་ནས་དགེ་ཚུལ་བསྒྲུབས། དེ་ནས་དཔལ་ལྡན་བཤད་སྒྲུབ་གླིང་གི་ཆོས་སྒོར་ཞུགས་ཏེ་རྣམ་འགྲེལ་དང་ཕར་ཕྱིན་ལ་སྦྱངས་པ་ཕུལ་དུ་ཕྱིན་པ་དང་། ཚོགས་ལངས་བཞེངས་ཤིང་ཁྱད་པར་བསྡུས་གྲྭའི་དམ་བཅའ་མིང་དང་དོན་མཐུན་པ་བཞག དགུང་ལོ་ཉི་ཤུ་ཐམ་པར་སྐྱབས་རྗེ་ཤིང་བཟའ་རྡོ་རྗེ་འཆང་གི་མདུན་ནས་ཚིགས་ཕྱི་མའི་སྡོམ་པ་བཞེས་ཤིང་བསླབ་བྱ་རྣམས་ཚུལ་བཞིན་བསྲུང་[1050]བར་མཛད། དགུང་ལོ་ཉེར་གསུམ་པ་དཔལ་ལྡན་གསང་སྔགས་རྒྱུད་པ་གྲྭ་ཚང་གི་ཆོས་སྒོར་ཞུགས་ཏེ་གསང་ཆེན་རྡོ་རྗེ་ཐེག་པའི་གཞུང་ལ་ཐོས་བསམ་ཕྲ་ཞིབ་གནང་། དགུང་ལོ་ཉེར་བཞི་པ་རབ་བྱུང་བཅོ་ལྔ་པའི་ཆུ་མོ་སྦྲུལ་ལོ་སྟེ་སྤྱི་ལོ 1893 ལོར་དུས་འཁོར་དཔོན་སློབ་ཀྱི་ཁྲི་ལ་བཞུགས་ནས་ཆོས་སྲིད་གཉིས་ཀྱི་སྒོ་ནས་ཐུགས་ཁུར་ཆེར་བཞེས་མཛད། དགུང་ལོ་སུམ་ཅུ་ཐམ་པར་དབུས་གཙང་དག་པའི་ཞིང་དུ་ཕེབས་ཤིང་རྒྱལ་བ་ཡབ་སྲས་དང་། ཇོ་ཤཱཀ་རྣམ་གཉིས་སོགས་རྟེན་དང་བརྟེན་པར་བཅས་པ་ལ་མཇལ་ཕྱག་སྨོན་འདུན་གནས་འབྲེལ་མཆོད་བཀུར་རྒྱ་ཆེར་མཛད། དེ་ནས་སྐུ་འབུམ་དུ་ཕེབས་ཏེ་དགུང་ལོ་སོ་གསུམ་པ་རབ་བྱུང་བཅོ་ལྔ་པའི་ཆུ་ཕོ་སྟག་ལོ་སྟེ་སྤྱི་ལོ 1902 ལོར་རྒྱུད་པ་མཁན་པོའི་ཁྲི་ལ་བཞུགས་ནས་འགྲིག་ལམ་ཀུན་སྤྱོད་དང་ཆོས་འཆད་ཉན་བཅས་ལ་དོ་དམ་གང་ལེགས་གནང་། ཁྲི་ཟུར་ནས་བསྟན་དང་འགྲོ་བའི་དོན་དུ་ཐུགས་ཁུར་མཛད་ནས་དུས་འདའ་པའོ། ཁོང་ནི་སྐུ་འབུམ་དུས་འཁོར་དཔོན་སློབ་ཀྱི་ཁྲི་རབས་སོ་དྲུག་པ་དང་། རྒྱུད་པ་མཁན་པོའི་ཁྲི་རབས་བདུན་ཅུ་དོན་ལྔ་པ་ཡིན་ནོ། །

Further Details