1. gangs can mkhas grub rim byon ming mdzod

ཁོང་ནི་རབ་བྱུང་དང་པོའི་ཤིང་མོ་ལུག་ལོ་སྟེ་སྤྱི་ལོ 1055 ལོར་འཕན་ཡུལ་པ་ཚབ་སྟོད་དུ་སྐུ་འཁྲུངས། འདས་ལོ་མི་གསལ། ཁོང་དགུང་ལོ་ཆུང་ངུའི་དུས་ནས་བསྟན་པའི་ཆོས་སྒོར་ཞུགས་ཤིང་རབ་བྱུང་དང་། དགེ་ཚུལ། དགེ་སློང་གི་སྡོམ་པ་རྣམས་རིམ་གྱིས་བཞེས་ཏེ་འདུལ་བའི་ཆོས་གཞུང་སོགས་ལ་སྦྱངས་པ་མཛད་ཅིང་། དེ་ནས་ཁ་ཆེར་ཕེབས་ཏེ་སཛྫ་ནའི་སྲས་གཉིས་གཙོ་བོར་གྱུར་པའི་པཎ་གྲུབ་མང་པོའི་ཞབས་ལ་གཏུགས་ཤིང་ལོ་ཉི་ཤུ་རྩ་གསུམ་གྱི་རིང་དུ་སློབ་གཉེར་ལེགས་པར་མཛད་དེ་བསྟན་བཅོས་མང་པོ་བོད་ཡིག་ཏུ་བསྒྱུར་བ་མཛད། བོད་ཡུལ་དུ་ཕེབས་པའི་ཚེ་སྤུ་ཧྲངས་པའི་དགེ་འདུན་སྤྱིས་གཡུ་བོ་ཆེ་ཕག་སྐུར་ཟེར་བ་ཞིག་ཕུལ་ནས་མཛོད་འགྲེལ་བསྒྱུར་བར་ཞུས་པས་དེ་བཞིན་བསྒྱུར། འཕན་ཡུལ་དུ་ཕེབས་དུས་གདུལ་བྱ་ཧ་ཅང་མི་ཆེ་བ་ལ་དགེ་བཤེས་ཤ་ར་བས་རང་གི་གྲྭ་པ་མང་པོ་ཁོང་ཉིད་ཀྱི་མདུན་དུ་དབུ་མ་སློབ་ཏུ་བཏང་བས་དེ་ནས་བཟུང་དབུ་མའི་འཆད་ཉན་ལེགས་པར་ཚུགས་ཏེ་སློབ་མ་མང་དུ་བསྐྱངས། ཁོང་གི་སློབ་[959]མ་གྲགས་ཆེ་བ་ནི་གཙང་པ་སར་སྤོས་དང་། རྨ་བྱ་བྱང་ཆུབ་ཡེ་ཤེས། དར་ཡོན་ཏན་གྲགས། ཞང་ཐང་སག་པ་ཡེ་ཤེས་འབྱུང་གནས་བཅས་ཡིན། ཁོང་གི་བསྒྱུར་རྩོམ་ནི《བཀའ་འགྱུར》ལས《འཕགས་པ་ཚེ་དང་ཡེ་ཤེས་དཔག་ཏུ་མེད་པའི་སྙིང་པོ་འཆི་མེད་རྔ་སྒྲའི་གཟུངས》 དང་། 《བསྟན་འགྱུར》ལས《བསམ་གྱིས་མི་ཁྱབ་པར་བསྟོད་པ》། 《རྗེ་བཙུན་འཇམ་དཔལ་གྱི་དོན་དམ་པའི་བསྟོད་པ》། 《མཛད་པ་བཅུ་གཉིས་ཀྱི་ཚུལ་ལ་བསྟོད་པ》། 《ལྷ་མོ་དམ་ཚིག་སྒྲོལ་མའི་བསྟོད་པ》། 《དཔལ་གསང་བ་འདུས་པའི་རྫོགས་རིམ་མཐར་ཕྱིན་པ》། 《འདུས་པའི་སྒྲུབ་ཐབས་རྣམ་པར་བཞག་པའི་རིམ་པ》། 《དཔལ་གསང་བ་འདུས་པའི་དཀྱིལ་འཁོར་གྱི་ཆོ་ག་ཉི་ཤུ་བ》། 《བྱང་ཆུབ་སེམས་དཔའི་རྣལ་འབྱོར་སྤྱོད་པ་བཞི་བརྒྱ་བའི་རྒྱ་ཆེར་འགྲེལ་བ》། 《རིགས་པ་དྲུག་ཅུ་བའི་ཚིག་ལེའུར་བྱས་པ》། 《རྣལ་འབྱོར་སྤྱོད་པ་བསྟན་བཅོས་བཞི་བརྒྱ་བ་ཚིག་ལེའུར་བྱས་པ》། 《དབུ་མ་རྩ་བའི་འགྲེལ་བ་ཚིག་གསལ་བ》། 《རི་མོར་བྲིས་པའི་བ་དྲུས་མ་ལས་འོ་མ་བཞོན་པས་བདེན་པ》། 《དབུ་མ་ལ་འཇུག་པ》། 《དབུ་མ་ལ་འཇུག་པའི་བཤད་པ》བམ་པོ་བཅུ་གཅིག་དང་བམ་པོ་སུམ་གཉིས་པ། 《མདོ་ཀུན་ལས་བཏུས་པ་ཆེན་པོ》། 《ཆོས་མངོན་པ་མཛོད་ཀྱི་འགྲེལ་བཤད་མཚན་ཉིད་ཀྱི་རྗེས་སུ་འབྲངས་པ》། 《འཇིག་རྟེན་ཕ་རོལ་གྲུབ་པ》བཅས་ཆོས་ཚན་སུམ་ཅུ་སོ་གསུམ་བཞུགས་སོ། །

Further Details