1. gangs can mkhas grub rim byon ming mdzod

[1009] ཁོང་གི་འཁྲུངས་ལོ་མི་གསལ། རབ་བྱུང་ལྔ་པའི་ལྕགས་ཕོ་རྟ་ལོ་སྟེ་སྤྱི་ལོ 1270 ལོར་ས་སྐྱར་སྐུ་གཤེགས། ས་སྐྱ་པཎ་ཆེན་ཀུན་དགའ་རྒྱལ་མཚན་ཧོར་རྒྱལ་པོ་གོ་དན་གྱིས་ལུང་དྲུག་སྡེ་བཞིར་གདན་དྲངས་ཁར་བླ་མ་འུ་ཡུག་པ་བསོད་ནམས་སེང་གེ་དང་། ཤར་པ་ཡེ་ཤེས་འབྱུང་གནས་མ་གཏོགས་དགེ་བའི་བཤེས་གཉེན་ཐམས་ཅད་ལ་ཕྱག་འཚལ་དུ་བཅུག་ནས་ཤཱཀྱ་བཟང་པོ་ས་སྐྱར་གཞི་གནས་པ་ལ་བསྐོ་བཞག་མཛད། ཕྱིས་འགྲོ་མགོན་ཆོས་རྒྱལ་འཕགས་པའི་སྐབས་སུ་སེ་ཆེན་རྒྱལ་པོས་ཟམ་གླུ་གུན་མིན་དབང་ཧུའི་གོ་གནས་དང་ཤེལ་གྱི་ཐམ་ཁ་གནང་ནས་དབུས་གཙང་གི་དཔོན་ཆེན་ལ་བསྐོས། ཁང་གསར་ཆེན་མོ་བཏབ་ཅིང་ཡུལ་བདེ་ཞོལ་འཇགས་མཛད། རབ་བྱུང་བཞི་པའི་ཆུ་མོ་ཡོས་ལོ་སྟེ་སྤྱི་ལོ 1243 ལོ་ནས་རབ་བྱུང་ལྔ་པའི་ལྕགས་ཕོ་རྟ་ལོ་སྟེ་སྤྱི་ལོ 1270 ལོའི་བར་ལོ་ངོ་ཉི་ཤུ་རྩ་བརྒྱད་ཀྱི་རིང་དུ་ས་སྐྱའི་དཔོན་ཆེན་མཛད། ལྷ་ཁང་ཆེན་མོའི་ལྕགས་རི་ཕྱི་ནང་བརྩིགས། རབ་བྱུང་བཞི་པའི་ཤིང་མོ་གླང་ལོ་སྟེ་སྤྱི་ལོ 1265 ལོར་ས་སྐྱའི་ལྷ་ཁང་ཆེན་མོ་བཞེངས་པའི་འགོ་བཙུགས་ནས་ལོ་ངོ་ལྔ་སོང་ཡང་མཇུག་མ་སྒྲིལ་བར་ཞི་བར་གཤེགས་སོ། ཁོང་ནི་ས་སྐྱ་པས་བློན་པོ་དྲིན་ཅན་དུ་བརྩིས་ནས་དུས་ལྟར་འདས་མཆོད་མཛད་སྲོལ་ཡོད།

Further Details