- dpon chen bsod nams rin chen
- ID:
- T272478
- དཔོན་ཆེན་བསོད་ནམས་རིན་ཆེན (Tibetan, Tibetan script, Original)
- > dpon chen bsod nams rin chen (Tibetan, Latin script, Transliteration-THL Extended Wylie Transliteration)
- > pönchen sönam rinchen (Tibetan, Latin script, Transcription-THL Simplified Tibetan Transcription)
Other Dictionaries
1. gangs can mkhas grub rim byon ming mdzod
ཁོང་ནི་སྤྱི་ལོའི་དུས་རབས་བཅུ་གསུམ་པའི་དུས་མཇུག་ཙམ་དུ་ཤར་ཕྱོགས་དྭགས་པོ་སྨད་ཀྱི་དབྲོང་ཀ་ཞེས་པར་སྐུ་འཁྲུངས། ཁོང་དགུང་ལོ་ཆུང་ངུའི་དུས་ནས་ཡིག་རྩིས་དང་། འཇིག་རྟེན་ལུགས་ཀྱི་[1010]བསྟན་བཅོས་ལ་ལེགས་པར་སྦྱངས། དེ་ནས་དགེ་སློང་ཚལ་པའི་དྲུང་དུ་ཕེབས་ཏེ་ཐེག་པ་ཆེ་ཆུང་གི་ཆོས་མང་དུ་གསན་པ་མཛད་ཅིང་ཆོས་སྲིད་གཉིས་ཀྱིས་མངའ་འབངས་བསྐྱངས། དེ་ནས་མདོ་ཁམས་སྨད་དུ་ཕེབས་ཏེ་འགྲོ་བ་མང་པོ་ནད་ཀྱི་སྡུག་བསྔལ་ལས་བསྐྱབས་པ་མཛད་ཅིང་བདེ་སྐྱིད་ཀྱི་གནས་སུ་བཀོད། རྒུན་འབྲུམ་གྱི་ས་བོན་ཡང་བསྣམས་ཏེ་རང་ཡུལ་དུ་ཁྱབ་གདལ་སྤེལ་བས་འདོད་འཇོའི་འབྲས་བུ་དུས་སུ་སྨིན་པར་མཛད། སླར་ཡང་དགེ་སློང་ཚལ་པའི་ཞབས་ལ་གཏུགས་ཏེ་གསོ་བ་རིག་པའི་གཞུང་ལུགས་ལ་ཆེད་དུ་སྦྱངས་པ་མཛད་པས་མཁས་པ་ཆེན་པོ་གྱུར་ཏེ་སློབ་མ་ཡང་མང་དུ་བསྐྱངས་ནས་གསོ་རིག་འཕེལ་རྒྱས་འགྲོ་བར་མཛད་རྗེས་མངོན་དུ་འཕགས་པ་བཞག དེ་ནས་ཀརྨ་པ་རང་བྱུང་རྡོ་རྗེའི (1284—1339) ཞབས་པད་ལ་བསྟེན་ནས་མདོ་སྔགས་ཀྱི་ཆོས་སྐལ་མང་དུ་ཐོབ། རང་ཉིད་ཀྱིས་བསོད་ནམས་བསགས་པའི་མཐུ་སྟོབས་ལས་གཡུ་ཆེན་རྒྱལ་མོ་འོད་འབར་ཞེས་པའི་ཡིད་བཞིན་གྱི་ནོར་བུ་ཕྱག་ཏུ་ཐེབས་ཏེ་ཆོས་རྒྱལ་སྲོང་བཙན་སྒམ་པོའི་མགུལ་རྒྱན་དུ་ཕུལ་བ་སོགས་བསྟན་པའི་ཞབས་ཏོག་བརྗོད་ཀྱིས་མི་ལངས་བ་མཛད་དོ། མདོར་ན་དཔོན་པོ་དང་སྨན་པ་སྦྲགས་མ་མཛད་ནས་མངའ་ཐང་དར་ཞིང་རྒྱས་པར་མཛད་ནས་དགོངས་པ་ཆོས་དབྱིངས་སུ་གཤེགས། ཁོང་གི་མཚན་གཞན་ལ་དཔོན་ཁམས་པ་གྲགས་པ་ཞེས་ཞུའོ། །
- language:
- Tibetan