Skip to main content Skip to search
thar shul dge 'dun chos skyong rgya mtsho
ID:
T272417
  • ཐར་ཤུལ་དགེ་འདུན་ཆོས་སྐྱོང་རྒྱ་མཚོ (Tibetan, Tibetan script, Original)
    • > thar shul dge 'dun chos skyong rgya mtsho (Tibetan, Latin script, Transliteration-THL Extended Wylie Transliteration)
    • > tarshül gendün chökyong gyatso (Tibetan, Latin script, Transcription-THL Simplified Tibetan Transcription)
Other Dictionaries

Other Dictionaries

1. gangs can mkhas grub rim byon ming mdzod

ཁོང་ནི་རབ་བྱུང་བཅུ་བཞི་པའི་ལྕགས་ཕོ་རྟ་ལོ་སྟེ་སྤྱི་ལོ 1810 ལོར་མདོ་སྨད་ཙོང་ཁའི་རི་རྒྱུད་རེབ་ཀོང་ཆ་ཇིའི་ཀླུ་མཁར་དུ་ཡབ་རྡོ་རྗེ་རབ་བརྟན་དང་། ཡུམ་དཔལ་འཛོམས་གཉིས་ཀྱི་སྲས་སུ་སྐུ་འཁྲུངས། རབ་བྱུང་བཅོ་ལྔ་པའི་ས་ཕོ་བྱི་ལོ་སྟེ་སྤྱི་ལོ 1888 ལོར་སྐུ་གཤེགས། དགུང་ལོ་ལྔ་པར་ཡི་གེའི་འབྲི་ཀློག་སྦྱངས། དགུང་ལོ་བདུན་པར་དགེ་འདུན་ཡར་འཕེལ་ལས་དགེ་བསྙེན་དང་དགེ་ཚུལ་གྱི་སྡོམ་པ་དཀྱུས་གཅིག་ཏུ་བཞེས། མཚན་ལ་དགེ་འདུན་ཆོས་སྐྱོང་རྒྱ་མཚོ་ཞེས་གསོལ། དགུང་ལོ་བཅུ་བཞི་པར་བདེ་ཆེན་དགེ་ཚོགས་གླིང་གི་ཆོས་གྲྭར་ཞུགས། ཕྱི་ནང་ཐུན་མོང་དང་ཐུན་མིན་གྱི་རིག་གནས་བཅས་ལ་སྦྱངས་པ་དཔྱིས་ཕྱིན་པ་མཛད། དགུང་ལོ་ཉི་ཤུ་ཐམ་པར་རྗེ་ངག་དབང་བསྟན་འཛིན་ལས་དགེ་སློང་གི་སྡོམ་པ་བཞེས། དགུང་ལོ་ཉེར་གཅིག་པར་མགུར་དགོན་རྣམ་རྒྱལ་གླིང་གི་གདན་ཁྲིར་ཕེབས། དགོན་པའི་ཀུན་སྤྱོད་དང་། ཆོ་ག་ཕྱག་ལེན་ཚང་མར་ཉམས་པ་སོར་ཆུད་དང་མི་ཉམས་གོང་འཕེལ་སྒོ་ནས་ལེགས་པར་བསྐྱངས། དགུང་ལོ་ཉེར་བཞི་པར་རང་ཉིད་ཀྱི་གདན་ས་བདེ་ཆེན་ཆོས་གླིང་དུ་ཕེབས་ནས་ཆོས་སྲིད་གཉིས་ཀྱི་ཐུགས་འགན་བཞེས་པས་གྲྭ་ཚོགས་རྒྱས་ཤིང་[794]འཆད་ཉན་གྱི་བྱ་བ་དར་རྒྱས་སུ་ཕྱིན། དགུང་ལོ་ཉེར་བརྒྱད་ནས་སོ་བརྒྱད་བར་ལོ་བཅུའི་རིང་དབེན་པར་ཉམས་ལེན་གཙོ་བོར་མཛད། དགུང་ལོ་སོ་དགུ་པར་དབུས་གཙང་ཆོས་ཀྱི་ཞིང་ཁམས་སུ་ཕེབས་ནས་རྒྱལ་པཎ་རྣམ་གཉིས་མཇལ་ཞིང་ཆོས་འབྲེལ་ཞུས། དེ་ནས་མི་རིང་བར་མདོ་སྨད་དུ་ཚུར་བྱོན། སྔ་རྗེས་སུ་བྲག་དཀར་གྱི་འདུ་ཁང་། བདེ་ཆེན་ཆོས་གླིང་གི་འདུ་ཁང་། རོང་བྲག་རྡོ་རྗེ་རྫོང་གི་འདུ་ཁང་། རྭ་རྒྱ་དགོན་གྱི་འདུ་ཁང་། ལྷ་རི་བསམ་གཏན་གླིང་གི་འདུ་ཁང་བཅས་གཙུག་ལག་ཁང་ཉི་ཤུ་ཙམ་གསར་བཞེངས་མཛད། བླ་བྲང་བཀྲ་ཤིས་འཁྱིལ་དུ་ཐེངས་གསུམ་ཕེབས་ཏེ་རྗེ་ཤེས་རབ་རྒྱ་མཚོ་ལས་དབང་ལུང་མན་ངག་མང་དུ་གསན། དགུང་ལོ་ང་བརྒྱད་པར་འཇམ་མོའི་གྲྭ་ཚང་། ཅོག་རོང་གྲྭ་ཚང་། ཧོར་རྒྱའི་གྲྭ་ཚང་། མི་ཉག་གྲྭ་ཚང་བཅས་གྲྭ་ཚང་ལྔའི་འདུ་ཁང་བཞེངས། དགུང་ལོ་དྲུག་ཅུ་པ་ནས་བཟུང་རང་དགོན་དུ་གཙོ་བོ་བཞུགས་ཐོག་ཉེ་འཁོར་གྱི་དགོན་སྡེ་ཁག་ལ་དམ་ཆོས་བསྩལ། དགུང་ལོ་དོན་ལྔ་པར་མཁར་སྔོན་ཧུ་ཐོག་ཐའི་སྤྲུལ་སྐུར་རབ་བྱུང་གི་སྡོམ་པ་གནང་ནས་མཚན་ལ་དགེ་འདུན་བསྟན་པ་ཕུལ་བྱུང་ཞེས་གསོལ། ཁོང་ནི་ཐར་ཤུལ་ཆོས་སྐྱོང་རྒྱ་མཚོའི་སྐུ་ཕྲེང་བཞི་པ་ཡིན། ཁོང་གི་སློབ་མ་གྲགས་ཆེ་བ་ནི་ཤིང་བཟའ་སྤྲུལ་སྐུ་བློ་བཟང་བསྟན་པའི་དབང་ཕྱུག་ཚུལ་ཁྲིམས་ཕུན་ཚོགས། ཁྲི་ཆེན་བློ་གྲོས་རྒྱ་མཚོའི་སྤྲུལ་སྐུ་བློ་བཟང་ཐུབ་བསྟན་རྒྱ་མཚོ། ལ་མོ་ཞབས་དྲུང་དཀར་པོའི་སྤྲུལ་སྐུ་དགེ་འདུན་བསྟན་འཛིན་ནོར་བུ། རྒྱ་ལུ་ཧུ་ཐོག་ཐུའི་སྤྲུལ་སྐུ་བློ་བཟང་ཡེ་ཤེས་བསྟན་དར་བཅས་ཡིན། ཁོང་གི་[795]གསུང་རྩོམ་ནི་རྣམ་ཐར་དང་། ཁྲིད་ཡིག་བསླབ་བྱ། ཆབ་ཤོག་སྒྲུབ་ཐབས་བཅས་ཆོས་ཚན་སོ་གཅིག་གིས་པོ་ཏི་གཅིག་ཏུ་བསྡུས་པ་ཐར་ཤུལ་དགོན་དུ་ཤིང་པར་བཞུགས་སོ།།

language:
Tibetan