1. gangs can mkhas grub rim byon ming mdzod

ཁོང་ནི་རབ་བྱུང་ལྔ་པའི་ཤིང་ཕོ་སྤྲེལ་ལོ་སྟེ་སྤྱི་ལོ 1284 ལོར་ཚོང་འདུས་སུ་སྐུ་འཁྲུངས། གདུང་རུས་གླན་ཡིན། རབ་བྱུང་དྲུག་པའི་ཤིང་མོ་སྦྲུལ་ལོ་སྟེ་སྤྱི་ལོ 1365 ལོར་སྐུ་གཤེགས། ཁོང་གཞོན་ནུའི་དུས་ནས་མཁྱེན་པ་ཤིན་ཏུ་ཆེ་ཞིང་སྔགས་གསར་རྙིང་དང་མཚན་ཉིད་ལ་ཡང་ཤིན་ཏུ་མཁས། ཤངས་པ་ཤཱཀྱ་འབུམ་ལས་གཤིན་རྗེའི་སྐོར་ལེགས་པར་གསན་པས་འཁྲུལ་འཁོར་ལས་སྦྱོར་སོགས་ལ་ཤིན་ཏུ་མཁས་ཤིང་མཐུ་ཡང་ཆེ། གཞོན་ནུ་སྐབས་སུ་གོང་མའི་བཀའ་ལུང་གིས་རྒྱ་ཡུལ་དུ་བྱོན་ཞིང་ཆར་ཕབ་པས་གོང་མ་དགྱེས་ཏེ་གནང་སྦྱིན་མང་པོ་གནང་བས་ནོམ་པ་ཆེན་པོ་དང་བཅས་པ་བོད་དུ་ཕེབས། ཆོས་རྗེ་རང་བྱུང་རྡོ་རྗེ་དང་བུ་སྟོན་རིན་ཆེན་གྲུབ་གཉིས་ལས་དུས་འཁོར་ལེགས་པར་གསན་ཞིང་མཁས་པར་གྱུར། རྫོགས་པ་ཆེན་པོ་ལ་སོགས་[1587]པའི་མན་ངག་རྣམས་ལ་ཉམས་ལེན་དྲག་པོ་མཛད། ཁྱད་པར་དུ་ཕུང་པོ་རི་བོ་ཆེ་དང་ར་དུམ་བྲག་ལ་སོགས་པའི་གནས་སུ་བཞུགས་ཏེ་གཞན་དོན་རྒྱ་ཆེན་པོ་མཛད། སྔགས་ཀྱི་སངས་རྒྱས་དང་མཚན་ཉིད་ཀྱི་སངས་རྒྱས་གཉིས་ཀྱི་ཁྱད་འབྱེད་མཛད་པ་བ་གཡག་སྡེ་པཎ་ཆེན་གྱིས་གཟིགས་པས་ཤིན་ཏུ་དད་དེ། དཔོན་སློབ་བཅོ་ལྔ་དང་མཉམ་དུ་ཕུང་པོ་རི་བོ་ཆེར་བྱོན་ནས་ཞབས་ལའང་གཏུགས་ཏེ་ཆོས་མང་དུ་གསན། ཁོང་གིས་སྐུ་ཚེའི་སྨད་ལ་ཚོགས་པ་ཆོས་ལུང་པ་ལས་བསྙེན་པར་རྫོགས་ཤིང་མཚན་ལ་རྡོ་རྗེ་འབུམ་ཞེས་གསོལ་ཡང་རྗེས་སུ་རྡོ་རྗེ་དཔལ་བ་ཞེས་སུ་བསྒྱུར། དེ་ནས་བསྟན་འགྲོའི་དོན་ཆེན་ལེགས་པར་གྲུབ་སྟེ་དགུང་ལོ་བརྒྱད་ཅུ་རྩ་གཉིས་པར་དགོངས་པ་ཆོས་དབྱིངས་སུ་གཤེགས། ཁོང་ནི་སྒྱུ་འཕྲུལ་གཙོ་བོ་མཛད་པའི་གསང་སྔགས་རྙིང་མའི་སློབ་དཔོན་ཆེན་པོ་ཞིག་ཡིན། །

Further Details