- ban de bran ka dpal yon
- ID:
- T237418
- བན་དེ་བྲན་ཀ་དཔལ་ཡོན (Tibetan, Tibetan script, Original)
- > ban de bran ka dpal yon (Tibetan, Latin script, Transliteration-THL Extended Wylie Transliteration)
- > ben dé dren ka palyön (Tibetan, Latin script, Transcription-THL Simplified Tibetan Transcription)
Other Dictionaries
1. Thupten Phuntsok Dictionary
(བན་དེ་ཞེས་བརྗོད་པ་ནི་རྟེན་རབ་ཏུ་བྱུང་བ་ཡིན་) ཁྲི་ལྡེ་སྲོང་བཙན་དང་ཁྲི་རལ་པ་ཅན་ཡབ་སྲས་གཉིས་ཀྱི་བློན་ཆེན། བློན་པོ་འདི་ཉིད་ཀྱིས་རྒྱལ་པོ་ཡབ་སྲས་གཉིས་ལ་ཆོས་དང་མཐུན་པའི་སྲིད་སྐྱོང་རོགས་ཞུས། ཡབ་ཁྲི་ལྡེ་སྲོང་བཙན་གྱི་སྐུ་དུས་སུ་བཙན་པོས་བློན་ཆེན་པོ་བྲན་ཀ་དཔལ་ཡོན་ལ་སོགས་པར་རྒྱ་དང་མཇལ་དུམ་བྱེད་པའི་ཆབ་སྲིད་ཀྱི་དོན་ཆེན་བཀའ་བསྩལ་ལུགས་ཆབ་མདོའི་ལྡན་མ་བྲག་བརྐོས་ཀྱི་ཡི་གེར་གསལ་ཡོད་ལ། སྲས་ཁྲི་རལ་པ་ཅན་གྱི་སྐུ་དུས་སུ་རྒྱ་བོད་གཉིས་ཕན་ཚུན་དམག་མི་དྲང་རྒྱུའི་ཆིངས་ཡིག་འཇོག་སྐབས་འདི་ཉིད་བོད་ཕྱོགས་ཀྱི་བློན་པོའི་གཙོ་བོ་ཡིན་པ་ལྷ་ལྡན་གཙུག་ལག་ཁང་མདུན་གྱི་རྡོ་རིང་གི་བྱང་ངོས་སུ་སྐབས་དེར་མཇལ་དུམ་ལ་ཞུགས་མཁན་བོད་ཕྱོགས་ཀྱི་བློན་པོའི་ཁོངས་ནས་འདི་ཉིད་ཀྱི་མཚན་ཨང་དང་པོར་བཀོད་ཡོད་པ་ནས་མཁྱེན་ཐུབ། འོན་ཀྱང་རྗེས་སུ་ཆོས་ལ་གནག་པའི་བློན་པོ་དབས་ཏོ་རེས་ཕྲ་མ་བཅུག་སྟེ། བློན་ཆེན་པོ་བྲན་ཀ་དཔལ་ཡོན་དང་རྒྱལ་པོའི་བཙུན་མོ་དཔལ་གྱི་ངང་ཚུལ་མ་ལྐོག་ཏུ་ཉལ་བཤམས་སོ་ཞེས་རྒྱལ་པོའི་སྙན་དུ་གསོལ་བས་ཁྲིམས་ལ་སྦྱོར་ཞིག་ཅེས་གསུངས་པ་ན་བཙུན་མོ་ངང་ཚུལ་མ་ཤིན་ཏུ་སྡུག་བསྔལ་ཏེ་རང་སྲོག་ལྕེབས་པ་དང་བློན་ཆེན་པོ་བྲན་ཀ་དཔལ་ཡོན་གྱིས་ཁོ་རང་བསད་ན་རྒྱལ་པོ་བཀྲོངས་ཀྱི་དོགས་ནས་བྱང་དུ་བྲོས། མཐར་བྱང་ཐང་དུ་བཀུམས་ནས་དམར་གདུང་སྙེ་ཐང་རྒྱ་གྲོང་ན་ཡོད་ཅེས་གྲགས། གཞན་ཡང་ལོ་རྒྱུས་ཡིག་ཚང་དུ་བློན་ཆེན་པོ་བྲན་ཀ་དཔལ་ཡོན་ཉེས་མེད་དུ་བསད་རྐྱེན་མཐར་གནོད་སྦྱིན་དུ་སྐྱེས་ནས་བོད་སིལ་བུའི་སྐབས་ཁེང་ལོག་གི་ངན་སྐུལ་བྱེད་མཁན་ཡིན་པའི་གཏམ་རྒྱུད་ཀྱང་མི་ཉུང་བ་ཞིག་ཡོད།
- language:
- Tibetan