- spro nang blo bzang smon lam
- ID:
- T273723
- སྤྲོ་ནང་བློ་བཟང་སྨོན་ལམ (Tibetan, Tibetan script, Original)
- > spro nang blo bzang smon lam (Tibetan, Latin script, Transliteration-THL Extended Wylie Transliteration)
- > tro nang lozang mönlam (Tibetan, Latin script, Transcription-THL Simplified Tibetan Transcription)
Other Dictionaries
1. gangs can mkhas grub rim byon ming mdzod
ཁོང་ནི་རབ་བྱུང་བཅུ་གཉིས་པའི་ས་མོ་བྱ་ལོ་སྟེ་སྤྱི་ལོ 1729 ལོར་མདོ་ཁམས་རྒྱལ་མོ་ཚ་བ་རོང་གི་སྤྲོ་ནང་དུ་ཡབ་ཨུ་ཎི་ཥ་དང་། ཡུམ་སྒྲོལ་མ་འཚོ་གཉིས་ཀྱི་སྲས་སུ་སྐུ་འཁྲུངས། རབ་བྱུང་བཅུ་གསུམ་པའི་ས་ཕོ་རྟ་ལོ་སྟེ་སྤྱི་ལོ 1798 ལོར་སྐུ་གཤེགས། ཁོང་དགུང་ལོ་ཆུང་ངུའི་དུས་ནས་དགའ་ལྡན་འགྲོ་ཕན་གླིང་གི་ཆོས་སྒོར་ཞུགས་ཏེ་ཡི་གེའི་སྦྱོར་ཀློག་དང་འདོན་ཆ་བཅས་ལ་བྱང་ཆུབ་པར་མཛད། དགུང་ལོ་བཅུ་བདུན་པར་དབུས་སུ་ཕེབས་ཏེ་འབྲས་སྤུངས་བློ་གསལ་གླིང་གི་ཆོས་གྲྭར་ཞུགས་ནས་བསྡུས་གཞུང་དང་། དབུ་མ། ཕར་ཕྱིན། འདུལ་བ། མངོན་པ་མཛོད། ཚད་མ་རྣམ་འགྲེལ་བཅས་ལ་ཐོས་བསམ་མཐར་ཕྱིན་པར་མཛད། གཞན་ཡང་བཀའ་གདམས་བསྟན་པའི་སྒྲོན་མེ་བྱམས་པ་རིན་པོ་ཆེ་དང་། རྗེ་ཡེ་ཤེས་རྒྱལ་མཚན། ཁྲི་ཆེན་བློ་བཟང་དྲི་མེད། ཁྲི་ཆེན་བསམ་གཏན་ཕུན་ཚོགས་སོགས་ལ་བསྟེན་ནས་བཀའ་གདམས་གཞུང་དྲུག་དང་། ལམ་རིམ་བློ་སྦྱོང་། གསང་བདེ་འཇིགས་གསུམ་གྱི་དབང་ལུང་ཁྲིད་བཅས་ཟབ་ཆོས་མཐའ་ཡས་པ་གསན་ཏེ་ལྷ་ལྡན་སྨོན་ལམ་ཆེན་མོའི་གྲྭ་སྐོར་མཛད། སེམས་དཔའ་མཆོག་སྤྲུལ་རིན་པོ་ཆེའི་ཡོངས་འཛིན་དུའང་བཞུགས། དགུང་ལོ་བཞི་བཅུ་ཐམ་པར་དཔལ་ལྡན་སྨད་རྒྱུད་གྲྭ་ཚད་དུ་ཞུགས་ཏེ་གསང་སྔགས་ཀྱི་གཞུང་དང་ཆོ་ག་ཕྱག་ལེན་བཅས་ལ་བྱང་ཆུབ་པར་མཛད་དེ་[1047]དགུང་ལོ་ཞེ་གསུམ་པར་སྨད་རྒྱུད་བླ་མ་དབུ་མཛད་ཀྱི་ཁྲི་དང་། དགུང་ལོ་ཞེ་བདུན་པར་རྒྱུད་པའི་མཁན་ཁྲི། དགུང་ལོ་ཞེ་བརྒྱད་པར་བྱང་རྩེའི་ཁྲི་ལ་ཕེབས་ནས་འཆད་ཉན་བསྐྱངས། དགུང་ལོ་ལྔ་བཅུ་ང་བདུན་པ་རབ་བྱུང་བཅུ་གསུམ་པའི་ཤིང་མོ་སྦྲུལ་ལོ་སྟེ་སྤྱི་ལོ 1785 ལོར་དགའ་ལྡན་གསེར་ཁྲི་ལ་བཞུགས་ནས་ལོ་བདུན་གྱི་རིང་དུ་གསེར་ཁྲི་བསྐྱངས་ཤིང་སྐུ་གསུང་ཐུགས་རྟེན་མང་དུ་བཞེངས། དེ་ནས་ཟུར་བཞུགས་མཛད་ཀྱང་ཁྲི་ཆེན་རེ་གསུམ་པ་སྐུ་ཚེ་མ་བརྟན་པའི་སྟབས་ཀྱིས་རབ་བྱུང་བཅུ་གསུམ་པའི་ཆུ་མོ་གླང་ལོ་སྟེ་སྤྱི་ལོ 1793 ལོར་སླར་དགའ་ལྡན་གསེར་ཁྲི་ལ་བཞུགས་ནས་ལོ་ངོ་གཉིས་ཀྱི་རིང་དུ་གསེར་ཁྲི་བསྐྱངས་ཤིང་མདོ་སྔགས་ཀྱི་འཆད་ཉན་གོང་ནས་གོང་དུ་འཕེལ་བར་མཛད། དགུང་ལོ་བདུན་བཅུ་ཐམ་པར་དགོངས་པ་ཆོས་དབྱིངས་སུ་གཤེགས། དགོངས་རྫོགས་ཀྱི་ཕྱིར་དུ་དངུལ་གདུང་བྱང་ཆུབ་མཆོད་རྟེན་བཞེངས་ཏེ་འབྲས་སྤུངས་བློ་གསལ་གླིང་དུ་བཞུགས་སོ། ཁོང་ནི་དགའ་ལྡན་གསེར་ཁྲི་འཛིན་པའི་ཁྲི་རབས་དྲུག་ཅུ་རེ་གཉིས་པ་ཡིན་ནོ། ཁོང་གི་མཚན་གཞན་ལ་བྱང་རྩེ་བློ་བཟང་སྨོན་ལམ་ཞེས་ཞུའོ། ། [1048]
- language:
- Tibetan